Prishtinë, 20 mars - Anëtari i kryesisë së AAK-së, Daut Haradinaj është shprehur i bindur se AAK-ja do t’i fitojë zgjedhjet e ardhshme nacionale.

Në një intervistë për “Epokën e re”, ai ka thënë se forcën për këtë fitore kësaj partie po ia jep Ramush Haradinaj pas kthimit triumfues nga Haga dhe numri i madh i qytetarëve që po i bashkohen këtij subjekti politik gjatë procesit të brendshëm zgjedhor.

“Unë jam i bindur se sot AAK-ja është një parti garuese për t’i fituar zgjedhjet në të ardhmen e afërt”, ka thënë Haradina

Ndërsa shkuarjen e ish-kreut të Degës së AAK-së në Rahovec në PDK, Haradinaj e ka vlerësuar normale. Ai ka thënë se kryetari aktual i kësaj komune, z. Smajl Latifaj, ka bërë një punë të jashtëzakonshme në këto zgjedhje.

Sipas tij, largimet e kuadrove nga PDK-ja në AAK dhe anasjelltas janë normale dhe nuk do të ndikojnë në të ardhmen në raportet ndërpartiake.

Kurse sa i përket dialogut për normalizimin e marrëdhënieve në mes të Kosovës dhe Serbisë, Haradinaj ka thënë se procesi nuk është në rrugë të keqe. Ai beson se delegacioni i Kosovës do të jetë i vëmendshëm dhe nuk do të bëjë ndonjë gafë e cila do t’i kushtonte Kosovës në të ardhmen.