Prishtinë, 15 qershor- Rrjeti i Grupeve të Grave të Kosovës (RrGGK) ka reaguar ndaj deklartave të zyrtarit të PDK-së në Gjakovë, Hajdar Beqa, i cili duke komentuar lëvizjet politike të Mimoza Kusari – Lilës, e quan atë “prostitutë politike”.

“RrGGK e konsideron këtë deklaratë absurde dhe shumë ofenduese për të gjitha gratë dhe vajzat e Kosovës, sidomos për gratë në politikë dhe vendim-marrje. Deklarata të tilla, e që kohëve të fundit nuk janë të pakta, vetëm e përforcojnë diskriminimin ekzistues social, politik dhe ekonomik gjinor në Kosovë”, thuhet nw kumtesws e kwtij rrjeti.

RrGGK e konsideron të papranueshme tërheqjen e paraleleve në mes të dështimeve në negociata dhe të qenurit grua.

RrGGK kërkon nga z.Beqa që të kërkoj falje për deklaratën ofenduese ndaj znj. Mimoza Kusari – Lila duke dënuar rëndë këtë gjuhës seksiste, si dhe çfarëdo lloji të justifikimit të diskriminimeve të tilla gjinore që shkelin ligjet e Kosovës.

Sipas Rrjetit, me këtë deklaratë, Hajdar Beqa ka shkelur Ligjin kundër Diskriminimit (2015) si dhe Ligjin për Barazi Gjinore (2015).