Prishtinë, 5 mars - Me iniciativën e Grupit të Grave Deputete (GGD), sot u mbajt një takim i përbashkët me përfaqësues nga  Presidenca, ministri i Shëndetësisë, Ferid Agani, UNDP, OSBE, NDI, OBSH (WHO).

Kryetarja e GGD-ës znj. Teuta Sahatqija  tha se Grupi i Grave Deputete duke parë se në vend është vërejtur  mungesa a vetëdijes sa i përket kërcënimit nga kanceri në mitër dhe ai i gjirit, si dhe nevoja për një kontroll të rregullt, është zotuar që të implementojë një projekt, i cili ka për  qëllim kryesor blerjen e një mamografi mobil, i cili do të gjejë  përdorim në të gjithë territorin e Kosovës. 

Në këtë projekt GGD-ja angazhohet në dy drejtime : takime me gra me qëllim të përfshirjes së atyre me ndikim në komuna, si  dhe në aspektin e vetëdijesimit  të grave në tërë vendin  për rëndësinë e testimit me kohë të kësaj sëmundjeje.

Po kështu, GGD-ja  zhvillon aktivitete me institucione dhe organizata  vendore dhe të jashtme me  qëllim të blerjes së mamografit mobil.
Takimi ishte organizuar me  qëllim që të ftuarit të jenë partnerë të  GGD-ës në realizimin e këtij projekti. Projekti pritet të përfundojë deri në fund të qershorit, ndërsa do ta menaxhojë, anëtarja e Bordit të GGD-ës, znj. Donika Kada Bujupi.

Ministri  Ferid Agani tha se Ministria e Shëndetësisë do të ofrojë  infrastrukturën e nevojshme për realizimin e këtij projekti, ndërsa me qëllim të koordinimit sa më të mirë do të caktojë një përfaqësuese nga  Bordi  për Sëmundjet Malinje.

Këshilltarja e presidentes, znj Ariana Qosja Mustafa, theksoi se presidentja është e përkushtuar ta përkrahë këtë iniciativë kaq të dobishme, jo vetëm për gruan, por edhe për familjen kosovare.

Përkrahje premtoi edhe përfaqësuesi i Organizatës Botërore të Shëndetësisë OBSH(WHO), Sami Uka.

Marie Berisha nga OSBE tha se do të mbështetet projekti sa i përket fushatës mediatike: (spotit, broshurës etj). Në takim përkrahje premtuan edhe përfaqësuesit nga UNDP dhe  NDI.

 Me këtë rast u vendos  që në takimin e ardhshëm të nënshkruhet memorandumi i bashkëpunimit, në mënyrë që ky projekt të përfundohet në kohën e planifikuar.