Prishtinë, 24 maj - Ashtu sikur vitin e kaluar Ministria e Mjedesit dhe Planifikimit Hapësinore sot organizon fushatën "Ta pastrojmë Kosovën" me të cilën do të mundohet që për një ditë të vetme t’a pastrojmë vendin tonë nga mbeturinat.

Fushata “Ta pastrojmë Kosovën” ka për qëllim mobilizimin e qytetarëve të Kosovës për ruajtjen dhe mbrojtjen e mjedisit. Fushata përmbyllet me aktivitetin i cili organizohet në tërë territorin e Kosovës.

Gjatë ditës së sotme synohet mobilizimi i mbi 50 mijë vullnetarëve për pastrimin e mbeturinave, duke përfshirë edhe deponitë e egra.

Kjo ditë që nga viti i kaluar është shpallur  Ditë Tradicionale e Pastrimit të Mbeturinave në Kosovë.

Kjo është pjesë e fushatës “ Let’s do it World” e cila në vitin 2013 do të zhvillohet në mbi 85 shtete të botës.

Në Kosovë fushata edhe në këtë vit është e organizuar nga grupi “Ta Pastrojmë Kosovën”, ndërsa Ministria e Mjedisit dhe Planifikimit Hapëesinor ka ofruar  kapacitetet e saja për të përmbyllur sa më me sukses këtë fushatë.

Edhe Ministria e Shëndetësisë e Republikës së Kosovës mbështet iniciativën “Ta pastrojmë Kosovën” si aktivitet i përbashkët i Ministrisë së Mjedisit dhe Planifikimit Hapësinor me institucione dhe organizata të tjera si dhe grupet lokale të bashkuara rreth Iniciativës“ Ta Pastrojmë  Kosovën ”.

Duke i dhënë mbështetje kësaj nisme, krerët e Ministrisë së Shëndetësisë, u bëjnë thirrje institucioneve shëndetësore të vendit, përkatësisht punonjësve të tyre, që duke filluar nga ora 10:00 kur nis aksioni zyrtarisht në shumë qytete të Kosovës, të dalin dhe të rregullojnë hapësirat e jashtme të institucioneve ku punojnë.