Prishtinë, 11 prill - Sot në selinë e Aleancës për Ardhmërinë e Kosovës, në një takim të veçantë, kryetari Ramush Haradinaj dhe kandidati për kryetar të Prishtinës, Besnik Tahiri, pritën Prof. Enver Petrovcin dhe bashkëpunëtorin e tij, aktorin e Teatrit Kombëtar, Veton Osmani.

Në këtë ceremoni, ku morën pjesë edhe zyrtarë të lartë të kryesisë, u dakorduan që Prof. Petrovci dhe aktori i mirënjohur, Veton Osmani, të bashkohen me AAK-në, si në nivel vendi ashtu edhe në kryeqendër për të zhvilluar dhe avancuar sektorin e artit dhe kulturës.

Duke e mirëpritur përzemërsisht bashkimin e Prof. Petrovcit dhe aktorit Osmani në AAK, kryetari Haradinaj theksoi se “për AAK-së dhe për mua personalisht, është një nderë që sot AAK-së iu bashkua një kuadër  shumë i vlefshëm i vendit, i cili në të gjitha etapat e shtetndërtimit të Kosovës ka treguar përkushtim, profesionalizëm dhe dinjitet në ngritjen e kulturës dhe artit në përgjithësi”.

Edhe Prof. Petrovci theksoi se ai është i nderuar që i bashkohet subjektit, konceptit dhe për më shumë, vizionit dhe lidershipit të AAK-së dhe Haradinaj.

Ata shprehen të gatshëm për të ndryshuar dhe avancuar vendin me fokus të veçantë zhvillimin dhe avancimin e kulturës dhe rikthimin e  vlerave që përgjatë dekadave e kanë mbajtë gjallë shpirtin e artit dhe kulturës.