Diskutohet zbatimi i deklaratës për partneritet mes Kuvendit dhe OJQ
Deputetë Kuvendit të Kosovës, të angazhuar në hartimin e kësaj deklarate, përfaqësues të organizatave të shoqërisë civile, si dhe të Misionit të OSBE-së në Kosovë, diskutuan për modalitetet e zbatimit të deklaratës dhe materializimit të saj në praktikë.
Nënkryetari i Kuvendit të Kosovës, Glauk Konjufca, pasi bëri një rezyme të punës dhe angazhimit të gjithanshëm për hartimin e kësaj deklarate, e konsideroi atë një dokument të rëndësishëm, i cili përcakton kornizën e bashkëpunimit ndërmjet legjislativit dhe shoqërisë civile. Sidoqoftë, nënkryetari Konjufca theksoi se puna e deritashme përbën vetëm gjysmën e rrugës, pasi që tani nevojitet zbatimit konkret dhe praktik i kësaj deklarate.
“Vetëm zbatimi i saj konkret do ta njëmendësonte bashkëpunimin ndërmjet Kuvendit dhe shoqërisë civile. Nevojitet vullnet i mirë dhe gatishmëri e të dy palëve për harmonizimin e veprimeve dhe krijimin e trupave të përbashkët”, theksoi Konjufca.
Duke falënderuar akterët e përfshirë në këtë proces, si: OSBE-në, deputetët dhe organizatat e shoqërisë civile, Konjufca potencoi rëndësinë e përfshirjes së më të madhe të shoqërisë civile në implementimin e saj, i cili, sipas tij, para së gjithash është në interes të publikut.
Driton Selmajan nga Instituti Demokratik i Kosovës (KDI), u ndal te qëllimi i deklaratës, e cila, sipas tij, synon promovimin e një dialogu aktiv ndërmjet dy palëve. Duke shprehur fjalë miradie për vendimin e Kuvendit, Selmanaj çmoi bashkëpunimin me deputetët e angazhuar në këtë proces, i cili, sipas tij, njëkohësisht ka shërbyer për të thyer paragjykimet e ndërsjella.
Sekretari i përgjithshëm i Kuvendit, Ismet Krasniqi, shprehu angazhimin dhe përkushtimin e administratës së Kuvendit për të ofruar mbështetjen e saj në implementimin e kësaj deklarate. Sekretari Krasniqi tha se kërkesat e shoqërisë civile shqyrtohen me prioritet nga ana e Kuvendit, kur ato adresohen drejt dhe saktë.
“Jemi njëri ndër institucionet më transparente, duke prezantuar punën tonë para mediave dhe publikut në përgjithësi”, theksoi sekretari i Kuvendit, ndërsa përmendi përgjigjet pozitive që Kuvendi ka dhënë në kërkesat e shoqërisë civile për qasje në dokumente publike.
Lidhur me themelimin e grupit punues i cili do ta mbikëqyrë implementimin e deklaratës dhe përzgjedhjen e organizatave të shoqërisë civile në këtë grup, foli përfaqësuesi i OSBE-së, Philip Annawitt.
Deputeti Zenun Pajaziti, ndërkaq, u ndal te rëndësia e përfshirjes sa më të madhe të shoqërisë civile në punën e Kuvendit, si në hartimin e legjislacionit, ashtu edhe të mbikëqyrjes sa më kualitative të punës.
Tryeza vazhdoi me diskutime nga përfaqësues të organizatave të shoqërisë civile, të cilët shpalosën sugjerimet e tyre për punën që duhet bërë në implementimin e deklaratës.
Kjo Deklaratë është përgatitur nga një grup i deputetëve të Kuvendit dhe përfaqësuesve të shoqërisë civile vitin e kaluar, me mbështetjen e Misionit të OSBE-së në Kosovë.
Më pas, kjo deklaratë është debatuar me më se 70 organizata të shoqërisë civile në një seri të tryezave të mbajtura në mbarë Kosovën.
Qëllimi i Deklaratës është të definojë parimet e përparimit të bashkëpunimit ndërmjet Kuvendit të Kosovës dhe shoqërisë civile, të lehtësojë pjesëmarrjen e organizatave të shoqërisë civile në bërjen e ligjeve nga Kuvendi dhe pjesëmarrjen e organizatave të shoqërisë civile në aktivitetet e mbikëqyrjes së ligjeve, si dhe të sigurojë mbështetjen e Kuvendit të Kosovës në zhvillimin e sektorit të shoqërisë civile në Kosovë.
