Prishtinë, 15 mars - Profesor Merxhan Avdyli, i cili ishte organizator i demonstratave të vitit 1981, ka vlerësuar se ngjarjet e ’81-shit kanë karakter tredimensional.

Në këtë intervistë për “Epokën e re”, Avdyli ka thënë se ngjarjet e ’81-shit, përpos karakterit historik, kombëtar dhe politik, kanë pasur edhe dimensionin e lirisë.

Ai ka thënë se demonstratat e vitit 1981 kanë qenë vazhdimësi e rrugës së lirisë për shqiptarët të cilët kanë qenë të shtypur nga sundimi jugosllav.

“Mund të themi se në historinë tonë kombëtare, ku ka pasur vite të shumta të kthesave historike, edhe para vitit 1981, që kanë luajtur rol të rëndësishëm, megjithatë viti 1981 është ai vit, i cili shquhet nga të tjerët. Ky vit është pika nga e cila është nisur udha e pakthyeshme dhe gjithnjë e vazhdueshme e lirisë, e cila është kurorëzuar me lirinë dhe pavarësinë që tash e ka Republika e Kosovës, e synuar atëherë, e përvijuar gjatë kohë dhe e kurorëzuar me luftën e Ushtrisë Çlirimtare të Kosovës”, ka thënë Avdyli.