Prishtinë, 2 shkurt - Instituti Demokraci për Zhvillim (D4D) organizon sot ceremoninë e nënshkrimit të Memorandumit të Bashkëpunimit për procesin zgjedhor, në mes të institucioneve që merren me administrimin e zgjedhjeve dhe shqyrtimin e rasteve zgjedhore.
 
Memorandumi i bashkëpunimi ka për qëllim ngritjen dhe vijueshmërinë  e bashkëpunimit të institucioneve të përfshira në proceset zgjedhore duke siguruar që kjo të bëhet në periudhën e para zgjedhjeve, gjatë zgjedhjeve si dhe pas zgjedhjeve. Kompleksiteti i gjithë ciklit zgjedhor si dhe parregullsitë e paraqitura në proceset e kaluara zgjedhore kanë shtruar nevojën për koordinim të vazhdueshëm në përmirësimin e ambientit që mundëson procese të rregullta zgjedhore.    

Pjesë e këtij memorandumi të bashkëpunimit është edhe shtojca  Veprimet Institucionale për Koordinim të Vazhdueshëm.

Ndërsa, Udhëzuesi për Shqyrtimin e Lëndëve Zgjedhore i cili është në fazën e hartimit nga përfaqësuesit e institucioneve, proces të cilin është duke e mbështetur D4D, synon të ofrojë informata të fokusuara për standardet, rregullat dhe procedurat kryesore të zgjedhjeve, përvojat e deritashme dhe të gjeturat e organizatave vëzhguese në zgjedhjet e kaluara.

Udhëzuesi ka për qëllim të iu ndihmojë prokurorëve, zyrtarëve policorë, gjykatësve apo juristëve në identifikimin e deformimeve të hasura në proceset e kaluara zgjedhore dhe çështjet që duhet konsiderohen në trajtimin e rasteve të ngjashme në të ardhmen.

Memorandumi i bashkëpunimit do të nënshkruhet nga Komisioni Qendror i Zgjedhjeve, Paneli Zgjedhor për Ankesa dhe Parashtresa, Këshilli Gjyqësor i Kosovës, Prokuroria e Shtetit dhe Policia e Kosovës, ku përfaqësuesit e secilit institucion do të kenë një fjalë rasti. 

Në ceremoninë e nënshkrimit të memorandumit do të ketë të ftuar përfaqësues të institucioneve, ambasadave të akredituara në Kosovë, organizatave ndërkombëtare, shoqërisë civile dhe mediave.

Arritja e Memorandumit të Bashkëpunimit për procesin zgjedhor në mes të institucioneve që merren me administrimin e zgjedhjeve është një nga disa aktivitetet që D4D ka zhvilluar në kuadër të projektit për drejtësinë zgjedhore të mbështetur nga Departamenti Federal për Punë të Jashtme të Zvicrës (FDFA).