Prishtinë, 31 gusht - Projekti i financuar nga BE-ja "Mbështetje Agjencisë së Regjistrimit Civil dhe Sistem të Unifikuar të Adresave" ka hyrë në një fazë të rëndësishme.

Sot, Agjencia Kadastrale e Kosovës, me mbështetjen e këtij projekti, do ta nis punën në terren për t’i mbledhur të dhënat e nevojshme për një sistem të unifikuar të adresave në Kosovë.

Parashihet që kjo punë në terren të kryhet brenda tre muajsh. Të dhënat e mbledhura do të futen në Sistemin Informativ të Regjistrit të Adresave (SIRA) për ta krijuar një regjistër elektronik të adresave për mbarë Kosovën, përfshirë edhe hartat e adresave.

Pritet që SIRA të jetë plotësisht funksionale kah fillimi i vitit 2013. Përgjegjëse për mirëmbajtjen e SIRA-s do të jetë Agjencia Kadastrale e Kosovës.

Qëllimi i përgjithshëm i këtij projekti të BE-së është që t’i ofrohet mbështetje Agjencisë së Regjistrimit Civil, nën Ministrinë e Punëve të Brendshme, që t’i përforcojë kapacitetet dhe procedurat e saj të punës dhe që t’u ofrohet mbështetje Agjencisë Kadastrale e Kosovës dhe komunave në realizimin e një sistemi të unifikuar të adresave për Kosovën.

Regjistri i adresave do të lidhet me të dhënat e gjendjes civile, kështu që çdo qytetar do të regjistrohet me një adresë zyrtare.

Në kuadër të këtij projekti, komunave dhe institucioneve relevante u janë ofruar trajnime, dokumentacion dhe staf mbështetës për punën në terren. Ky projekt pesëmilionësh menaxhohet nga Zyra e Bashkimit Evropian në Kosovë dhe realizohet nga B&S Europe.

Me rastin e lansimit të aktiviteteve në terren, zëvendësshefi i Operacioneve, Melvin Asin, tha të gjithë në Kosovë do të përfitojnë nga ky sistem i unifikuar i adresave, qofshin institucionet publike, ndërmarrjet komunale apo bizneset private apo edhe qytetarët e rëndomtë.

"Posa ky sistem të vihet në funksion, ai do ta rrisë cilësinë e një vargu të gjerë të shërbimeve, nga dorëzimi i dërgesave tuaja postare e deri te shërbimet emergjente".