Bruksel, 10 janar - Brukseli nuk ia ka arritur që të bindë palën serbe që procesin e inaugurimit të komunave serbe dhe funksionimin e tyre ta bëjë konform ligjeve të Republikës së Kosovës.

Meqenëse takimet e së enjtes nuk kanë treguar ndonjë përparim është vendosur që me biseda të vazhdohet edhe sot.

Zëvëndeskryeministrja e Kosovës Edita Tahiri, ka deklaruar për RTK se Bashkimi Evropian e ka qëndrimin e qartë: se zgjedhjet janë mbajtur sipas ligjeve të Kosovës ndërsa inaugurimi dhe funksionimi i komunave duhet të jetë njëjtë sipas këtyre ligjeve dhe konform marrëveshjes së Brukselit.

Takimet e mbajtura ishin bilaterale, ku pala evropiane nga një anë bisedonte me delegacionin e Kosovës, ndërsa nga ana tjetër me atë të Serbisë.

Në delegacionin serb bënte pjesë edhe kryetari i komunës së Zveçanit i cili përfaqësonte të gjithë kryetarët e komunave serbe të Kosovës.

Sipas Edita Tahirit zyrtarët e Brukselit tashmë kanë informuar se nuk kanë pasur sukses që të bindin palën serbe dhe kjo është arsyeja përse do të vazhdohet me trysni edhe gjatë ditës së premte.