Ohër, 12 mars -Përfaqësues të komunave të anamoravës dhe të shoqërisë civile nga këto komuna kanë diskutuar gjatë kësaj fundjave në Ohër të Maqedonisë për nevojën e thellimit të bashkëpunimit mes pushtetit lokal dhe shoqërisë civile si dhe për bashkërendimin e aktiviteteve në fusha të ndryshme.

Në këtë punëtori tri ditore të mbajtur në Ohër, nën organizim të “D-Press” në bashkëpunim me Institutin Kosovar për Qeverisje Lokale dhe me mbështetje të FES, është elaboruar dhe është diskutuar gjendja aktuale e shoqërisë civile dhe bashkëpunimin e tyre me strukturat komunale.  

Fatmir Matoshi nga D-Press tha se gjendja aktuale e bashkëpunimit mes komunave dhe organizatave të shoqërisë civile në komunat e anamoravës është jo e mirë, për shkak se sipas tij, komunat nuk e kanë kuptuar drejt rolin e tyre të bashkëpunimit për të siguruar qeverisje më gjithëpërfshirëse dhe më transparente.

Nënkryetari i Komunës së Ranillugut, Lulzim Canaj, duke folur për gjendjen dhe bashkëpunimin e Komunës me OJQ-të lokale, tha se duhet punuar shumë për një skanim të gjendjes dhe për një informim më të saktë të vet komunave për të parë se çfarë OJQ funksionojnë brenda Komunave dhe cili është profili i tyre.

“Komunat mund të bashkëpunojnë shumë më shumë me shoqërinë civile dhe duke bashkëpunuar më shumë me ta, duke i shfrytëzuar edhe këto kapacitete të shoqërisë, mund të ofrojmë shumë më shumë shërbime më cilësore, shumë më shumë transparencë dhe mobilizim të qytetarëve për bashkëpunim më të madh me strukturat e pushtetit komunal”, tha Canaj.   

Edhe nënkryetari i Vitisë, Abdyl Bajrami, tha se në këtë komunë ka mjaft organizata të shoqërisë civile që janë funksionale dhe mund të jenë partnere shumë të mira për komunën për bashkërendim të aktiviteteve në fusha specifike.

Ndërsa nënkryetari i Novobërdës, Driton Abdyli, tha se shoqëria civile mund të ndikojë shumë në afirmimin e kësaj komune në aspektin strategjik të zhvilliit duke e prezantuar tek komunitete të ndryshme në Kosovës turizmin rural që Novobërda po e zhvillon.

“Ne bashkëpunojmë me OJQ dhe i ndihmojmë aq sa kemi mundësi ato për disa aktivitete të tyre, por që mund të bëhet edhe më shumë në të ardhmen”, tha Abdyli.

Zyrtarë të tjerë të komunave, gjatë diskutimeve për tejkalimin e sfidave dhe përmirësimin e gjendjes aktuale, theksuan nevojën që krerët e komunave të kenë parasysh krijimin e një fondi të veçantë brenda komunave për të participuar në projekte të ndryshme në interes të komunave edhe kur OJQ-të kanë siguruar një mbështetje nga një donator i tretë.   

Duke folur në këtë aspekt, Fatmir Haxholli, përfaqësues i KLGI-së tha se në këtë kohë të proceseve integruese, komunat duhet të jenë më inovative dhe ta kuptojnë rolin e shoqrësië civile, sepse sipas tij, janë partner me potenciale të mëdha që mund ti sjellin komunës investime përmes realizimit të projekteve.

“Tani është koha që komunat të mendojnë që duke i shfrytëzuar kapacitetet e shoqërisë civile, përmes bashkëpunimit, të aplikojnë bashkërisht në fonde të organizatave të ndryshme ndërkombëtare”, tha Haxholli.  

Përfaqësuesit e komunave në këtë punëtori premtuan se gjatë këtij viti, do të bëjnë takime me organizata të shoqërisë civile për të parë mundësitë e bashkërendimit të aktiviteteve dhe planifikimeve të përbashkëta për ide dhe punë gjatë vitit.