Nju Jork, 16 korrik - Sekretari i përgjithshëm, Ban Ki Moon nesër nis turneun në Ballkan.

Ndalesa e parë e tij do të jetë në Slloveni, duke vazhduar me Kosovën, Maqedoninë.

Sekretari i përgjithshëm i OKB-së, Ban Ki – Moon prej të hënës do të nisë vizitën e tij 10-ditëshe në Ballkanin Perëndimor.

Ndalesa e parë e tij do të jetë në Slloveni, me takimet me presidentin Danilo Tirk, kryeministrin Janez Jansha dhe kryetarin e Parlamentit, Gregor Virant.

Më pas ai do të qëndrojë në Kroaci, në takimet me ministren e jashtme Vesna Pushiq dhe do të jetë i pranishëm me një leksion në Akademinë për Zhvillim Politik me rastin e 20 vjetorit të anëtarësimit të Kroacisë në OKB. Më pas Ki – Moon do të jetë në Brione, ku do të pritet nga presidenti kroat Ivo Josipoviq dhe kryeministri Zoran Milovanoviq. Në Kroaci, sekretari i OKB-së do të vizitojë edhe lokalitetet dhe monumentet historike që janë nën mbikëqyrjen e UNESCO-s.

Sekretari i OKB-së vijon me qëndrimin në Malin e Zi dhe takimet me kreun shtetëror të këtij vendi, ndërsa do të qëndrojë edhe në qytetin Cetinje, si kryeqytet historik i Malit të Zi. Nga Mali i Zi vazhdon turi në Serbi, ku janë paraparë takimet me kreun shtetëror serb.

Destinacion i radhës do të jetë Kosova, ku do të pasojnë takimet me vizitën në misionin e UNMIK-ut në Prishtinë, dhe më pas takimet me presidenten Atifete Jahjaga, kryeministrin Hashim Thaçi dhe kryeparlamentarin Jakup Krasniqi. Ai gjithashtu në Kosovë do të vizitojë manastirin e Deçanit, një Pjesë e Trashëgimisë Botërore të UNESCO-s, si dhe qytetin e Prizrenit.
 
Sekretari i Përgjithshëm i Kombeve të Bashkuara më pas do të qëndrojë në Shkup, ku janë paraparë takimet me presidentin Gjorgje Ivanov, kryeministrin Nikolla Gruevski dhe agjenda e vizitave të tjera. Në Shkup, sekretari Ban Ki – Moon do të mbajë një fjalim në Parlamentin e Maqedonisë.

Ndalesa e fundit do të jetë Bosnjë – Hercegovina, ku kanë paraparë takimet me kreun shtetëror të këtij vendi, vizita në Srebrenicë dhe lokacione tjera.
 

Sekretari i përgjithshëm i Kombeve të Bashkuara, Ban Ki-mun, duket se ka synuar t’i zvogëloj shqetësimet e Serbisë se vizita e tij në Kosovë, si pjesë e turneut ballkanik, mund të jetë e lidhur me shpalljen e pavarësisë nga ana e Kosovës, raporton AFP.

Në një intervistë të publikuar sot në mediat serbe, Ban Ki-mun thotë se vizita është në harmoni me Rezolutën 1244 të Këshillit të Sigurimit të Kombeve të Bashkuara.

Presidenti i Serbisë, Tomisllav Nikoliq, ka thënë se vizita e zyrtarit të lartë në Kosovë, mund të paraqet “disa probleme”.

Ban Ki-mun do të jetë sekretari i parë i përgjithshëm i OKB-së, që e viziton rajonin prej shpalljes së pavarësisë së Kosovës.

Ai të enjten arrinë në Slloveni, për një turne njëjavëshe, me ç’rast do ta vizitoj Kosovën, Kroacinë, Malin e Zi, Serbinë dhe Bosnjë Hercegovinën.