Avdullah Hoti kandidat i LDK-së për kryeministër
Kandidaturën e tij e bëri publike kryetari i LDK-së Isa Mustafa në një konferencë për media. Vendimi është marr pas mbledhjes së Kryesisë së kësaj partie.
Kryeministri i Kosovës, në largim, njëkohësisht kryetar i LDK-së, Isa Mustafa, ka thënë se pas konsultave me drejtues të partisë është përcaktuar që Avdullah Hoti të jetë kandidati i këtij subjekti për kryeministër në zgjedhjet e parakohshme parlamentare.
LDK hyri në një process të përzgjedhjes së kandidatit për kryeministër, pak ditë pasi zoti Mustafa në një tubim partiak në Istog, paralajmëroi mos-kandidimin e tij për këtë post.
Kandidimi i Hoti erdhi në ditën kur pritet të përmbyllet afati kohor për regjistrimin e koalicioneve parazgjedhore.
Isa Mustafa tha se Hoti ka marrë mbështetjen “e të gjithë anëtarëve, përfshirë edhe nënkryetarët e partisë, që njëkohësisht janë edhe kryetarë të tri komunave në Kosovë”.
Avdullah Hoti, ministër i financave në largim është një prej anëtarëve të rinj të partisë dhe në periudhën kur Isa Mustafa ishte kryetar i Prishtinës, kreu detyrën e nënkryetarit të tij.
Ai tha se “ka marrë mbështetjen e plotë të LDK-së dhe pas dy vitesh e gjysmë të qeverisjes, ajo po ia vlerëson rezultatet e punës si ministër”.
“Besoj në kauzën tonë të përbashkët dhe parimet që i ka LDK-ja", tha Hoti.
Hoti tha se kjo ditë për të është dita më e madhe e jetës së tij. “E marrë si përgjegjësi të jashtëzakonshme dhe besoj se me këtë unitet të LDK-së ky koalicion do t’i fitojë zgjedhjet e ardhshme”, tha Hoti.
