Prishtinë, 10 korrik - Përfaqësuesja e lartë e Bashkimit Evropian për Politikë të Jashtme dhe Siguri, Catherine Ashton, është shprehur e kënaqur me procesin e deritashëm të zbatimit të Marrëveshjes për normalizimin e marrëdhënieve ndërmjet Kosovës dhe Serbisë.

Ashton këtë qendrim e ka shprehur në një konferencë për media të mbajtur së bashku me Kryeministrin e Republikës së Kosovës, Hashim Thaçi.

Sipas saj, ky dialog ka bërë që në Kosovë sot të shihen shumë ndryshime pozitive. Kurse ndryshimi dhe zhvillimi më i rëndësishëm sipas baroneshës Ashton është pikërisht marrëveshja me Serbinë.

“Marrëveshja politike është përkthyer në veprime të duhura praktike për zbatimin e saj”, ka thënë Ashton.

Ajo ka falënderuar në disa raste kryeministrin Thaçi për rolin e tij në këtë dialog, si edhe ekipet punuese teknike të cilat kohë pas kohe i vazhdojnë punimet në Bruksel.

Mirëpo, para se të ndërmerren edhe disa hapa konkret drejt zbatimit të Marrëveshjes me Serbinë në pjesën veriore të Kosovës, palët e konsiderojnë si të domosdoshëm miratimin e Ligjit të Amnistisë.

E pyetur nga gazetarët se a është e informuar që qeveria përmes ligjit të amnistisë ka përfshi edhe vepra të kryera jashtë territorit të veriut, Ashton tha se nuk dëshiron të përzihet në çështjet që i takojnë Qeverisë së Kosovës.

Por, sipas saj, me zbatimin e këtij ligji do të tregohet përkushtimi i Prishtinës për zbatimin e marrëveshjes.

“Unë nuk dua të përfshihen në atë se si mendojnë qeveria dhe kryeministri t’i qojnë para çështjet që u takojnë atyre. Mirëpo interesimi im është që të sigurohemi që ajo për të cilën është arritur marrëveshje të zbatohet. Shpresojmë që zbatimi i Ligjit do të jetë demonstrim i përkushtimit jo vetëm të qeverisë por edhe Kuvendit”, është shprehur Ashton.

Ndërkohë, kryeministri Hashim Thaçi ka thënë se nuk është Kosova e para që po miraton Ligjin mbi amnistinë.

Sipas tij, një ligj i tillë është më se i nevojshëm për zbatimin e marrëveshjes me Beogradin. Ndërkaq kundërshtarët e këtij ligji i ka ftuar ta lexojnë atë më mirë dhe të informohen drejtë rreth përmbajtjes së tij.

“E di se ka pasur keqkuptime dhe keqinterpretime të ndryshme, herë të motivuara politikisht, por edhe mos-informime të ndryshme. Por, në rrethana çfarë jemi ne, duke e respektuar edhe Marrëveshjen e 19 prillit, Ligji për amnisti është i nevojshëm, është i domosdoshëm dhe të njëjtën kohë është një standard i marrëveshjeve politike çfarë është edhe ajo e 19 prillit”, ka thënë Thaçi.

Ligj për amnisti sipas tij kanë bërë edhe vendet tjera të rajonit, duke u nisur nga Sllovenia, Kroacia, Bosnje dhe Hercegovina, Serbia në vitin 2001, dhe pastaj edhe Maqedonia me Marrëveshjen e Ohrit. 

\"Por, unë dua të theksoj se e gjitha që është përfshirë, është përfshirë në kuadër të Kushtetutës, dhe ligjeve të Kosovës, dhe është jashtëzakonisht me interes, që e gjithë skena politike kosovare, me përjashtime të vogla, është unike dhe mbështetëse e procesit të normalizimit të marrëdhënieve në mes të Kosovës dhe Serbisë.\"

\"Dhe, ne të gjithë këtë përpjekje që jemi duke bërë, jemi duke e bërë në atë drejtim, që të integrohen njerëzit në shoqërinë dhe institucione, dhe jo të përjashtohen\", ka thënë Thaçi.