Prishtinë, 30 janar - Pas shqetësimeve të ngritura në seancën e fundit të Kuvendit të Kosovës  lidhur me përmbajtjen e fletoreve të punës për deputetë, furnizuesi i Kuvendit sipas kontratës për furnizim, Aerocom, i ka adresuar sot administratës së Kuvendit sqarimin se përmbajtja e notesit nuk është përcaktuar as nga Kuvendi i Kosovës e as nga furnizuesi.

Kuvendi, thuhet në sqarim, ka porositur notesë  A-4, në sasi 150 copë, vetëm me logon e Kuvendit.

Tutje sqarohet se  citimet në fletoret e punës (notes) janë vënë nga prodhuesi serik i tyre, ndërmarrja “Fokus” me seli në Zagreb (Kroaci), duke pohuar se me  të njëjtit notesë janë furnizuar një varg institucionesh qendrore të  Kosovës dhe disa ndërmarrje publike, duke i përmendur ato edhe me emër.

Bazuar në gjendjen e krijuar, furnizuesi i ka kërkuar falje Kuvendit dhe ka bërë furnizimin e ri  me fletoret e punës, duke mënjanuar citatet e përfolura.