Prishtinë, 21 nëntor - Anëtari i Kryesisë së AAK-së, Muharrem Nitaj, ka bërë me dije se AAK-ja nuk ka kurrfarë marrëveshje me PDK-në e LDK-në sa i përket çështjes së demarkacionit.

Në këtë intervistë për “Epokën e re” ai ka thënë se raportimet që janë bërë të premten në disa medie, kinse AAK-ja është afër një marrëveshje me këto dy parti, janë përpjekje për ta zbehur veprimin e kësaj partie.

Nitaj ka thënë se AAK-ja mbetet pjesë e opozitës së bashkuar dhe presin që Isa Mustafa dhe Hashim Thaçi të reflektojnë.

“AAK-ja nuk ka hyrë për të bërë pazare, që të thuhet se plotësojeni njërën prej marrëveshjeve e për tjetrën nuk ka problem”, ka thënë Nitaj.

Megjithatë, Nitaj ka bërë me dije se për të dalë nga situata aktuale duhet të reflektojnë pozita dhe opozita.

Ai ka deklaruar se secili lider duhet ta kuptojë përgjegjësinë që ka dhe të lëvizë nga pozicioni.

Sipas Nitajt, në këtë drejtim përgjegjësinë më të madhe e kanë liderët institucionalë.

Ai ka vlerësuar se edhe liderët e opozitës duhet të tregohen më fleksibilë në kërkesat e tyre.

“Në këtë situatë duhet të reflektojnë të gjithë, përfshirë edhe presidenten e vendit, e cila i ka marrë disa hapa, duke përfshirë kryeministrin dhe zëvendësin e tij, pse jo edhe liderët e opozitës të tregohen më fleksibilë në kërkesat e tyre dhe në qasjen që ata e kanë”, ka thënë Nitaj.

Sipas tij, në këtë iniciativë duhet të përfshihen edhe diplomatët e huaj me ndikim në Prishtinë.

“Normalisht, duke përfshirë këtu edhe diplomatët që kanë fuqi dhe janë akredituar në Prishtinë. Pra, besoj se të gjitha palët kanë nevojë të përfshihen në këtë projekt dhe ta rikthejnë Kosovën në gjendje normale”, është shprehur Nitaj.

Ai ka thënë se dhuna në rrugë dhe në Kuvend tregon se ajo mund të eskalojë dhe të ketë përmasa më të mëdha.

I pyetur nëse AAK-ja është duke biseduar me PDK-në dhe LDK-në për një marrëveshje politike për demarkacionin, Nitaj ka thënë se Aleanca për Ardhmërinë e Kosovës nuk ka biseduar me asnjërën prej këtyre partive politike për ta realizuar ndonjë marrëveshje.

\"Në fakt, ne nuk kemi kërkesë për të pasur marrëveshje me këto parti politike. Insistimi ynë është i qartë. Ne kemi pasur kundërshtime të mëdha lidhur me dy marrëveshjet që janë nënshkruar, njëra nga kryeministri aktual Isa Mustafa, tjera nga zëvendësi i tij, Hashim Thaçi. Ne kemi kërkuar anulimin e këtyre dy marrëveshjeve dhe nuk kemi kërkuar asnjë marrëveshje me partitë politike në pushtet. Shkrimet se AAK-ja është afër një marrëveshje me PDK-në dhe LDK-në mund të jenë ndoshta përpjekje për ta zbehur veprimin tonë, por ne nuk kemi kërkuar asnjë marrëveshje me këto parti. Besojmë se topi është në duart e Qeverisë, e jo në duart e partive politike\", tha ai.