Prishtinë, 14 dhjetor - Aleanca për Ardhmërinë e Kosovës (AAK) pritet të nisë të hënën bisedimet me Partinë Demokratike të Kosovës (PDK) për bashkëqeverisje.

Edhe PDK-ja nuk e mohon e bisedimeve me Aleancën, por mohojnë se deri në këtë moment kanë biseduar për koalicionin e mundshëm, ndërsa theksojnë se një gjë e tillë mund të ndodhë në ditët në vijim.

Në një prononcim për Zërin zëvendëskryeministri dhe nënkryetari i PDK-së, Hajredin Kuçi nuk e ka përjashtuar mundësinë e bisedimeve.

“Unë nuk kam informata se ka takime për këtë qëllim këto ditë. Kryeministri edhe si kryetar i Partisë Demokratike të Kosovës mund të zhvillojë takime të tilla”, ka thënë Kuçi.

Ndërkaq analistët politik besojnë se fakti që ende nuk ka asgjë konkrete në raport me bashkëqeverisjen PDK-AAK, është tregues se krerët e këtyre partive nuk po arrijnë të bien në ujdi për ndarjen e pozitave.