Mitrovicë, 9 tetor - Përfaqësuesi i Bashkimit Evropian në Kosovë, Samuel Zhbogar, premtoi të martën gjatë një vizite në Mitrovicë vazhdimin e projekteve për këtë qytet.

Gjatë takimit me kryetarin e komunës, Avni Kastrati, ai theksoi se Mitrovica është përfituesja më e madhe e projekteve që mbështeten nga BE-ja në Kosovë.

Zhbogar ka vlerësuar shumë edhe përkushtimin e kryetarit Kastrati për menaxhimin e projekteve që janë realizuar këtu.

“Jemi shumë të kënaqur që projektet që realizohen këtu janë mirëmbajtur dhe janë treguar të suksesshme”.

Ai tha se këtë vizitë e realizon në kuadër të fushatës “Është koha për Evropë”. “Mendoj që është koha që Evropa të jetë më shumë e pranishme këtu”.  

Ndërsa, kryetari Kastrati, falënderoi përfaqësuesin e BE-së për mbështetjen e pakursyer për realizimin e projekteve që kanë krijuar kushte më të mira për jetë në Mitrovicë.

Ai përmendi projektet si Qendra multifunksionale, Palestra e sportit, Qendra e biznesit, mandej Ujësjellësi rajonal etj.  

Në takim kryetari Kastrati edhe për problemet dhe sfidat në këtë pjesë të Kosovës. Ai ceku problemin e lëvizjes së lirë në veri, që është duke vështirësuar  jetën e qytetarëve.
 
Si hap pozitiv ai vlerësoi punën e Zyrës Administrative në Veri dhe bashkëpunimin e ngushtë me stafin e atjeshëm.