Shtime, 9 janar - Kompania e Ujësjellësit Rajonal ”Prishtina” ka njoftuar se bashkë me Institutin Kombëtar të Shëndetësisë Publike të Kosovës kanë përcjellë me shqetësim dhe vëmendje të shtuar situatën e krijuar së fundmi në Republikën e Kosovës, respektivisht në Komunën e Shtimes si zonë e shërbimit të kompanisë, pas vërshimeve nga reshjet e dendura atmosferike, duke u ofruar në vazhdimësi qytetarëve mbështetje dhe përkrahje maksimale.

Më  7 janar 2016, KUR ”Prishtina” kishte funksionalizuar prodhimin e ujit për Komunën e Shtimes, pas ndërprerjes një ditore të furnizimit, duke u sugjeruar konsumatorëve që ujin para se t’a përdorin për pije, t’a vlojnë atë, për shkaqe sigurie të shëndetit publik, deri në njoftimin e radhës.

Gjatë ditës së sotme, Instituti Kombëtar i Shëndetësisë Publike të Kosovës në bashkëpunim me Departamentin e Kualitetit të Ujit në kuadër të KUR”Prishtina” pas marjes së mostrave të ujit dhe analizimit të tyre në laboratorin fiziko-kimik dhe bakteriologjik dy ditë radhazi, dalin me rekomandim përfundimtar, se uji në Komunën e Shtimes mund të përdoret për pije, pasi që rezultatet e analizave janë brenda Standardeve të Udhëzimit Administrativ 16/2012 -  Cilësia e ujit për konsum njërëzor.