Prishtinë, 1 gusht - Bazuar në ligjin mbi Menaxhimin e Financave Publike dhe Përgjegjësitë,  Ministri i  Financave Bedri Hamza, ka prezantuar sot në mbledhjen e rregullt të Qeverisë së Republikës së Kosovës, raportin financiar të Buxhetit të Republikës së Kosovës për gjashtëmujorin e parë të vitit 2012.

Ministri Hamza paraqiti një përmbledhje të raportit  për gjashtëmujorin e parë të vitit 2012, për të hyrat dhe shpenzimet, duke i pasqyruar të dhënat në formë analitike dhe krahasuese me vitin paraprak.

“Të hyrat gjatë gjashtëmujorit të parë të vitit 2012, duke mos përfshirë grantet e përcaktuara të donatorëve si dhe fondet në mirëbesim, janë 649.76 milion euro dhe paraqesin 42.3% të pranimeve të përgjithshme vjetore të planifikuara, ndërsa kemi një rritje prej 12 %, krahasuar me periudhën e njëjte të vitit paraprak”.

Ndërsa, sa i përket shpenzimeve, Ministri Hamza, tha se “Shpenzimet gjatë këtij gjashtëmujori, duke mos përfshirë grantet e përcaktuara të donatorëve si dhe fondet në mirëbesim, kanë qenë 625.60 milion euro dhe paraqesin 40% të planit të përgjithshëm vjetor.”

Ministri Hamza, njoftoi se “Si rrjedhim nga mbledhja më e madhe e te hyrave në krahasim me pagesat bilanci primar është rritur për  25.26 milion euro deri me 30 Qershor 2012”.

Ai ka shtuar se “Bilanci bankar reflekton ruajtjen e fondeve nga viti paraprak dhe gjendja e mjeteve në llogaritë bankare të Buxhetit te Republikës se Kosovës me 30 Qershor , 2012  është  231.94 milion euro” .