Prishtinë, 12 nëntor - Në mbledhjen e sotme të Kryesisë së Kuvendit të Republikës së Kosovës, të drejtuar nga dr. Jakup Krasniqi, kryetar i Kuvendit, në të cilën merrnin pjesë edhe shefat e grupeve parlamentare, është vendosur që gjatë kësaj jave të mbahen dy mbledhje plenare të Kuvendit.

Seanca e së enjtes i kushtohet shqyrtimit  të parë të Projektligji për Buxhetin e Republikës së Kosovës për vitit 2013.

Arsyetimin e këtij projektligji, shumë të rëndësishëm për vendin, para deputetëve  pritet ta  bëjnë kryeministri i Kosovës, Hashim Taçi dhe ministri i Ekonomisë dhe i Financave, Bedri Hamza. 

    Në këtë seancë, si rëndom, deputetët pritet të ngrenë deklarime jashtë rendit të ditës, si dhe të shtrojnë pyetje parlamentare për punën e Qeverisë së Kosovës.

Kryesia ka miratuar kërkesën e kryeministrit të  Kosovës, Hashim Thaçi, për ta informuar  Kuvendin lidhur me  takimin e tij të dytë me kryeministrin e Serbisë, Ivica Daçiq. Për bisedimet që po zhvillohen me Serbinë, kryeministri do të flasë në seancën e së premtes.

Në po këtë seancë, deputetët do të kenë mundësinë të bëjnë deklarime jashtë rendit të ditës.

Do të shqyrtohen për herë të parë: Projektligji për ekzekutimin e sanksioneve penale, Projektligji për sigurinë dhe shëndetin në punë, Projektligji për ansamblin  kombëtar të këngëve dhe valleve “Shota” dhe  për ansamblet tjera, si dhe  Projektligji për ndryshimin dhe plotësimin e Ligjit për Akademinë e  Shkencave dhe të Arteve të Kosovës. Për herë të dytë, ndërkaq, do të shqyrtohet Projektligji për dhënien në shfrytëzim dhe këmbimin e pronës së  paluajtshme të Komunës.

Duke e shqyrtuar për herë të dytë kërkesën për formimin e Komisionit Ad-hoc për përzgjedhjen e anëtarëve të Bordit të Radio-Televizionit të Kosovës, Kryesia ka kërkuar nga grupet parlamentare që deri në seancën e së premtes t’i propozojnë nëntë anëtarë të Komisionit Ad-hoc për përzgjedhjen e anëtarëve të Bordit të RTK-së (PDK-ja dhe LDK-ja nga dy kandidatë, kurse grupet e tjera parlamentare nga një kandidat), në mënyrë që të formalizohet përbërja e këtij komisioni.

Kryesia ka mbetur ta shqyrtojë edhe një herë kërkesën  Grupit të Grave Deputete për ndihmë financiare për blerjen e aparaturës së Mamografit Mobil, pasi të marrë informata shtesë për këtë projekt të grave deputete.

Anëtarët e Kryesisë janë njoftuar lidhur me pjesëmarrjen e komisioneve parlamentare në konferencën e mbajtur në Mal të Zi, si dhe për vizitën e Komisionit për Arsim të realizuar në Bullgari.