Prishtinë, 13 maj - Zëvendësministri  i Financave, Ramadan Avdiu  ka pritur në vizitë drejtorin e  Zyrës për Evropë dhe Euro-Azi nga Thesari Amerikan Jeffrey Baker.

Me këtë rast zëvendësministri Avdiu në emër të Ministrisë së Financave falënderoi  Shtetet e Bashkuara të Amerikës për bashkëpunimin dhe për ndihmën që i ka dhënë Kosovës për zhvillimin ekonomik dhe politik  gjatë  këtyre viteve,  e në veçanti për ngritjen e kapaciteteve në Ministrinë e Financave.

Ndër tjera ai tha  “Ne si Ministri e Financave ndihemi  të  privilegjuar se që nga themelimi  kemi pasur dhe vazhdojmë të kemi mbështetjen e plotë të Qeverisë amerikane dhe këshilltarëve të saj nga Departamenti i Thesarit amerikan dhe USAID-i”.

Në këtë takim gjithashtu është diskutuar për situatën makrofiskale në Kosovë,  ku zëvendësministri  Avdiu  ka informuar Baker për rrjedhat makroekonomike në Kosovë, për trendin e të hyrave,  dhe për ekzekutimin e buxhetit.

Ndërsa, drejtori i Zyrës për Evropë dhe Euro-Azi nga Thesari Amerikan Jeffrey Baker,  duke shprehur falënderimin për pritjen nga  zëvendësministri i Financave, Ramadan Avdiu tha se SHBA do të vazhdoj të ofrojë ndihmë dhe mbështetje  për Kosovën edhe në të ardhmen duke përfshirë këtu edhe ndihmën për Ministrinë e Financave.

Ai gjithashtu vlerësoi lartë bashkëpunimin e deritashëm në mes të dy vendeve.