Paris, 29 janar - Politikanët francezë i dolën në mbrojtje shëndetit të ekonomisë, pasi Ministri i Punës, Michel Sapin, e konsideroi shtetin si “tërësisht të falimentuar”.

Ministri francez i Financave, Pierre Moscovici, sulmoi konstatimin e Sapin, duke i cilësuar fjalët e tij si të “papërshtatshme”.

”Franca është një vend në gjendje të zgjidhë problemet e tij, tërësisht i besueshëm dhe besimplotë në lidhje me ekonominë”, deklaroi Moscovici.

Numri një i financave shtoi se gjendja, “ndonëse jo optimale”, nuk i afrohet aspak përshkrimit të Sapin dhe se pavarësisht disa problemeve me buxhetin, nuk ekziston një rrezik për shkurime masive në administratë dhe shërbimet që ofron shteti.

Sipas mediave, deklarata e ardhur nga ministri i qeverisë socialiste së Hollande, ose është një gafë e pabesueshme, ose një deklaratë që synon të përgatisë kombin për rrugën e vështirë përpara.

Ndërkohë, presidenti Hollande, pranoi se do ta ketë të pamundur të zbatojë premtimin e tij për reduktimin e defiçitit buxhetor brenda kufirit të 3%. Sipas parashikimeve, defiçiti për 2013-n do të jetë prej rreth 4,5%.

Borxhi total i Francës, në fund të 2012-s kaloi nivelin e 90% të Prodhimit të Brendshëm Bruto, dukshëm mbi kufirin e rrezikshmërisë të vlerësuar me 60%.

Presidenti Hollande, ndryshe nga shumë homologë të tij europianë, po favorizon rritjen e taksave, në vend të shkurtimeve buxhetore, si një mënyrë për daljen nga kriza.