Jerusalem, 14 gusht - Lufta një mujore në Gazë e ka lënë këtë territor të shkatërruar dhe ndërsa në Egjipt po zhvillohen negociata për një armëpushim të përhershsëm, paralelisht po fillojnë edhe planet për rindërtimin e Gazës.                                                 

Rindërtimi i Gazës do të kërkojë miliarda dollarë, pas dëmeve të shkaktuara gjatë luftës së muajit të fundit midis Izraelit dhe grupit Hamas. Sektori industrial i Gazës është dëmtuar rëndë nga operacionet ushtarake izraelite.

Fabrika e Wael Wadeia-s, në lindje të Gazës, në të cilën punonin rreth 200 persona, u shkatërrua në korrik, duke i lënë punëtorët dhe familjet e tyre pa të ardhura.

Fabrika, që prodhonte artikuj ushqimorë, u bombardua nga ushtria izraelite, vetëm 5 vjet pasi ishte dëmtuar edhe më parë gjatë luftës në Gazë në vitin 2009.

“Ne e rindërtuam faabrikën dhe kishim leje nga Ministria e Shëndetësisë dhe këshilli bashkiak. Kishim blerë pajisje të reja dhe i kishim instaluar. Fabrika filloi të prodhonte në mars të këtij viti”, thotë pronari i fabrikës Wael Wadeia.

Veç fabrikës së familjes Wadeia, u shkatërruan edhe 500 objekte të tjera, si fabrika dhe biznese bujqësore, me një vlerë prej 300 milionë dollarësh, sipas Dhomës së Tregëtisë të Rripit të Gazës.

Niveli i papunësisë është ngritur me 50 për qind, e barabartë me 210 mijë palestinezë në Gazë që kanë mbetur pa të ardhura.

“Numri i punëtorëve në fabrikë ishte 150 deri në 200. Ata mbanin familjen me 5 ose 10 anëtarë me të ardhurat nga paga. Vetëm një pjese prej tyre, që punonin me orë të plota po u paguajmë tani gjysëm page”, thotë zoti Wadeia.

Megjithatë, jashtë Gazës, disa i shohin shkatërrimet si një mundësi të re për investime.

Theodore Karasik, drejtor i firmës konsulente Inegma, nga Dubai, thotë se shtetet e Gjirit mund të investojnë në Gazë kur të përfundojë lufta.

“Nga sulmet izraelite janë shkatërruar pjesë të tëra të Gazës. Izraeli thotë se e ka shkatërruar gjithe rrjetin e tuneleve. Kjo situatë ndoshta hap një dritare të re mundësish për investime për rindërtimin e Gazës.”

Zoti Karasik thotë se janë spekulime zërat se plani arab për investime në Gazë është pjesë e negociatave të armëpushimit.

Izraeli është i përgatitur për investime të mëdha për rindërtimin e Gazës në shkëmbim të çarmatosjes së Hamasit, thotë ai.

“Tel Avivi dhe Këshilli i Bashkëpunimit të Gjirit, duan të shkojnë së bashku dhe të krijojnë një plan zhvillimi që gëzon miratimin politik të Izraelit”, thotë zoti Karasik

Ideja se Izraeli dhe shtetet e Gjirit mund të jenë duke shqyrtuar mundësinë e arritjes së një marrëveshjeje me Autoritetin Palestinez, duke përjashtuar Hamasin, nuk është e re. Spekulime të kësaj natyre kanë ekzistuar që nga viti 2006 gjatë luftës në Liban.