Vjenë, 27 nëntor - Përkundër rrethanave të vështira ekonomike dhe parashikimet e kufizuara për zhvillimet ekonomike, Raiffeisen Bank International AG (RBI) ka arritur profit para tatimit prej 696 milionë Euro në tremujorin e tretë të vitit 2013.

Profiti pas tatimit është zvogëluar për 48.0 për qind në 461 milionë Euro (Q3 2012: 889 milionë Euro) si rezultat i përqindjes së rritur të tatimit. Profiti i konsoliduar ka shënuar rënie prej 51.2 për qind në 411 milionë Euro në krahasim me periudhën e njëjtë të vitit të kaluar (Q3 2012: 842 milionë Euro). Të hyrat për aksion kanë shënuar rënie për 2.21 Euro në 1.34 Euro. 

\"Duke ju falenderuar përmirësimit të dukshëm të margjinave të interesit neto, ne kemi rritur të hyrat operative për pothuajse 7 për qind brenda nëntë muajve të parë. Edhe fakti që të hyrat tona janë rritur më shumë sesa shpenzimet është sukses për ne. Por, ne dëshirojmë të jemi shumë më të mirë dhe po synojmë të mbajmë kostot e vitit 2016 në nivelin e njëjtë me kostot e vitit 2012. Duke pasur parasysh edhe lëvizjet e inflacionit, mbajtja e kostos së njëjtë do të korrespondonte me kursimin e rreth 450 milionë Eurove në tre vjetët e ardhshme. Me \"Fit for Future 2016\", ne e kemi zhvilluar dhe filluar një program gjithëpërfshirës për kursimin e kostove në kuadër të të gjithë grupit dhe kjo do të na mundësojë të arrijmë synimin tonë \", tha Karl Sevelda, drejtor ekzekutiv i RBI.

Në total, rezultatet operative të RBI arritën në 1,837 milionë Euro për tre muajt e parë të vitit 2013, që paraqet një rritje prej 10.4 për qind në krahasim me periudhën e njëjtë të vitit 2012 (Q3 2012: 1,664 milionë Euro).

Provizionimi neto për mbulimin e kredive joperfomuese është rritur për 28 për qind në krahasim me periudhën e njëjtë vitin e kaluar dhe ka arritur në 800 milionë Euro. Shpenzimet e përgjithshme administrative janë rritur për 94 milionë Euro dhe kanë arritur shifrën prej 2,430 milionë Euro; shumica e këtyre shpenzimeve administrative është e lidhur me konsolidimin dhe integrimin e Polbank në maj të vitit 2012. Si rezultat i të hyrave më të larta operative, raporti i shpenzimeve/të hyrave ka shënuar rënie për 1.5 pikë përqindjeje në 56.9 për qind.

Shpenzimet e punonjësve, me 50 për qind, paraqesin pjesën më të madhe të shpenzimeve të përgjithshme administrative. Këto shpenzime janë rritur për 4 për qind dhe kanë arritur shifrën e përgjithshme prej 1,227 milionë Euro.

Ndërsa, numri i punonjësve (me orar të plotë) deri në fund të tremujorit të tretë ishte 58,772.

Asetet e përgjithshme të RBI ishin 131 miliardë Euro ndërsa nëse e krahasojmë me fundin e vitit 2012, asetet kanë shënuar rënie për 4 për qind ose 5.1 miliardë Euro.

Në fund të tremujorit të tretë të vitit 2013, kreditë dhe paradhëniet për klientë ishin 76.8 miliardë Euro ndërsa depozitat e klientëve kanë arritur shifrën prej 67.5 miliardë Euro.