Prizren, 27 shkurt - EC Ma Ndryshe në kuadër të projektit "Transparenca online e Komunës së Prizrenit" ka marrë pjesë në mbledhjen e radhës të kryetarit të komunës, Ramadan Muja me drejtorët komunal, ku janë miratuar disa konkluzione.

Ec Ma Ndryshe ka njoftuar se qeveria komunale e Prizrenit ka miratuar propozimin e Drejtorisë së Inspektoratëve lidhur me propozim vendimin për inspektoratin komunal. Në kuadër të propozim vendimit për inspektoratin komunal të Prizrenit janë paraparë masa ndëshkuese.

Dispozitat e këtij vendimi të propozuar sipas Ec Ma Ndryshe, parashohin dënime në të holla prej 500 deri në 2500 euro ndaj personit juridik për kundërvajtje dhe atë: nëse nuk e zbaton  procesverbalin apo aktvendimin e inspektorit komunal, pengon inspektorin gjatë kryerjes së punës  ose refuzon  që inspektorit t’ia ofrojë  shënimet të cilat ai i kërkon.

Nëse nuk e lajmëron inspektorin komunal për kryerjen e masave  të urdhëruara, me gjobë prej 100 deri 250 euro do të dënohet personi përgjegjës e kështu me radhë. Propozim vendimi i është përcjellë KPF-së dhe KK-së për miratim të mëtejmë.

Ekzekutivi lokal ka miratuar kërkesat e Drejtorisë për Punë dhe Mirëqenie Sociale për shpronësimin e pronës së paluajtshme në rrugën ”Nënë Terezë", te ish-banesat e Solidaritetit, ku pas shpronësimit do të ndërtohet kompleksi i ri banesor dhe të tillat do t’i dedikohen familjeve të dëshmorëve, invalidëve të luftës dhe familjeve skamnore.

Po ashtu është miratuar kërkesa për lejimin e mjeteve për mirëmbajtjen e Strehimores  së Përkohshme Kolektive “Farmakos” në Prizren, që strehon 22 familje me gjithsejtë 103 anëtarë.

Kanë kaluar edhe kërkesat e Drejtorisë për Shëndetësi për blerjen e paisjeve medicinale, për nevojat e shërbimeve shëndetësore në QKMF, QMF-ve dhe AMF-ve, (parallogaria 70 mijë euro), sikurse edhe vendimi për mbështetje financiare për realizimin e vizitave mjekësore për klasat I,V dhe IX, në shkollat fillore të Komunës së Prizrenit (parallogaria 7 mijë euro).

Drejtorisë për Ekonomi dhe Financa i është dhënë drita e gjelbërt për formimin e bordit për shqyrtim të ankesave të tatimit në pronën e paluajtshme për vitin 2013, sipas Ligjit për tatimin në pronë të paluajtshme nr.03/L-204.

Ec Ma Ndryshe ka theksuar se në këtë mbledhje kanë kaluar edhe kërkesat e Drejtorisë të Turizmit dhe Zhvillimit Ekonomik për lejimin e shpalljes së tenderit – Ndriçimi i objekteve monumentale, (parallogaria 20 mijë euro) si dhe Hartimin e Projektit të Ndërtimit të Qendrës Informtive Turistike të Komunës së Prizrenit.

Drejtorisë për Shërbime Publike i është lejuar shpallja e tenderit për rirregullimin e rrethojave metalike dhe paisjeve ambientale, nëpër hapësira të gjelbëruara, sikurse edhe mbjellja e fidanëve drunore dekorative në qytet, si dhe  lejimi i mjeteve për ndërtimin e kanalizimit në rrugen”Ali P. Tepelena 1”.

Ekzekutivi lokal ka miratuar njëzëri edhe konkluzionin e Drejtorisë për Bujqësi dhe Zhvillim Rural për emërimin e anëtarëve për komisionin Komunal për regjistrimin e pronave të bujqësisë për vitin 2013 që do të ofrojë të dhëna reale  bujqësore për nivelin qendror dhe lokal të qeverisjes.