Kaçanik, 23 prill - Palmat e llojit “Bismarckia nobilis” qenë mbëltuar vjeshtën e kaluar në qytetin e Kaçanikut, i kanë mbijetuar acarit të dimrit të kaluar.

Stina e pranverës dhe moti i ngrohtë i ka “gjallëruar” 23 copë palmat e mbjellura përgjatë rrugës “Ismail Raka”.
Palmat e llojit “Bismarckia nobilis” qenë mbëltuar vjeshtën e kaluar në qytetin e Kaçanikut.

Mbëltimi i palmave ishte pjesë e projektit dy vjeçar: “Rregullimi i gjelbërimit në rrugën “Ismail Raka”.

Faza e dytë e projektit tani më ka filluar të realizohet ndërsa përmban mbëltimin e 88 copë pisha të argjendta, ndërtimin e 23 mini kopshteve me lule, vend pushimoret dhe ulëset përgjatë rrugës dhe vendosjen e 60 copë shporta për hedhjen e mbeturinave.

Betim Shala, menaxher i projektit ka thënë se në fazën e parë, të realizuar vitin e kaluar,  përveç palmave është bërë edhe rregullimi i shiritave të gjelbërimit për mbjelljen e barit slloven të llojit “Opatia”, mbjellja e 46 copë pisha të llojit “Smarak”, sistemi i ujitjes nëntokësor pikë – pikë. Projekti i gjelbërimit është duke u bërë në gjatësinë e rrugës “Ismail Raka”, prej 750 metrash ndërkaq për realizimin e të dy fazave të këtij projekti, komuna ka shpenzuar gjithsej 66 mijë e 573 euro.