Nuk do të ketë rritje të normave tatimore
Përkundër faktit se Kabineti i Ministrit në deklaratat dhënë mediave kanë thënë se nuk do të ketë rritje të tatimeve, disa media duke u thirrur në burime anonime kanë shkruar se një gjë e tillë do të ndodh.
Në këtë mënyrë me tekstet e njëanshme dhe pa kurrfarë baze, duke shkruar në mënyrë arbitrare, disa media kanë shkaktuar shqetësime në mesin e qytetarëve të vendit dhe bizneseve.
Në këto tekste përveç tjerash konstatohet se ekonomia e vendit tonë është e ngulfatur nga obligimet ndaj tatimeve dhe doganës, edhe pse e vërteta është se Kosova aktualisht ka normat më të ulëta të të gjitha tatimeve dhe doganës në rajon.
Pa dashur që të hyjmë se kujt mund t’i shërbejnë shkrimet e tilla dëshirojmë me përgjegjësinë më të lartë institucionale dhe shtetërore të themi se tekstet e tilla më së paku i shërbejnë informimit të drejtë dhe të gjithanshëm të qytetarëve të Kosovës.
Dhe për fund dëshirojmë të theksojmë se Ministria e Financave sikurse edhe deri më tash edhe në të ardhmen do të jetë e hapur për t’ju përgjigjur interesimit të medieve dhe për të siguruar transparencë të plotë për punën dhe realizimin e obligimeve ligjore.
