Prishtinë, 4 shkurt - Në Ministrinë e Tregtisë dhe Industrisë u nënshkrua Marrëveshja për Projektin për promovimin e punësimit në sektorin privat, ku  ministrja e Tregtisë dhe Industrisë, Hykmete Bajrami dhe  drejtori Zyrës Zvicerane për Bashkëpunim në Kosovë, Markus Baechler,  finalizuan aktin e nënshkrimit të kësaj marrëveshje.

Ky projekt parasheh rritjen e punësimit fitimprurës dhe të qëndrueshëm për gratë dhe burrat në Kosovë përmes ndërmarrjeve të vogla dhe të mesme (NVM), që operojnë në sektorë ekonomikë konkurrues dhe të mirë-organizuar, ku politikat publike përputhen më mirë  me nevojat e sektorit privat. NVM-të e sektorëve të përzgjedhur do të rrisin produktivitetin e tyre dhe do të gjenerojnë të hyra shtesë dhe punësim.

Ministrja Bajrami, me këtë rast, pasqyroi edhe prioritetet dhe objektivat strategjike të Ministrisë të cilën e drejton, si dhe mbështetjen e zhvillimit të sektorit privat, duke përmirësuar klimën e biznesit.

Ajo prezantoi edhe avancimin e politikave tregtare, si dhe përmirësimi i lëvizjes së lirë të mallrave që do të jenë pjesë e strategjisë zhvillimore të ekonomisë vendore.

Po ashtu, ministrja Bajrami bëri të ditur se do të ketë përmirësime të theksuara edhe në qasjen e inkurajimit të investitorëve të huaj për të parë Kosovën si vend atraktiv për investime.

Ndërkaq, Markus Baechler, drejtori i Zyrës Zvicerane për Bashkëpunim theksoi se kjo marrëveshje do të ketë reflektime pozitive në fusha të ndryshme në sektorin privat në Kosovë, si dhe do të ndikojë edhe në ngritjen e kapaciteteve afariste për zhvillim të qëndrueshëm  të afarizmit kosovar.

Vlera e këtij projekti do të jetë 5’798’000.00  CH (pesë milionë e shtatëqind e nëntëdhjetë e tetë mijë franga zvicerane) dhe se zbatimin e tij  do ta bëjë konsorciumi në përbërje: “Swisscontact”, “Instituti Riinvest” dhe “PEM Consult”, që është përzgjedhur nga  Zyra Zvicerane për Bashkëpunim në Kosovë. Marrëveshja për realizimin e këtij projekti është për periudhën trevjeçare, duke filluar më 16 nëntor 2014 e  deri më 15 nëntor 2017. 

Përmes këtij projekti, Ministria e Tregtisë dhe Industrisë do të kontribuojë në krijimin e ambientit të favorshëm për zhvillimin e mundësive të punësimit në Kosovë, si dhe do të ndërmarrë të gjitha masat për të siguruar lejet e nevojshme dhe miratimet, në mënyrë që të mundësohet zbatimi i këtij projekti në mënyrë efikase dhe në kohë.