Athinë, 28 shkurt - Rreziku për një dështim të Greqisë do të mbetet i lartë edhe pas marrëveshjes për ristrukturimin e borxhit të arritur javën e kaluar, theksoi agjencia e vlerësimit ”Moody’s Investors Service” në një studim të publikuar sot.

“Njoftimi i 21 shkurtit për një mbështetje për Greqinë është një hap i rëndësishëm, por rreziku i falimentimit mbetet i lartë, edhe pas zbatimit të këtij këmbimi nën presionin e kreditorëve të vendit”, theksoi analistja Sarah Carlson në një shënim të përjavshëm.

“Ngarkesa e borxhit grek do të mbetet e rëndë për disa vite dhe vendi nuk do të jetë në gjendje të hyjë në tregun privat pas përfundimit të planit të dytë të asistencës”, nënvizoi Moody’s.

“Rezultati i zgjedhjeve, që pritet të zhvillohen në muajin prill, përbën gjithashtu një rrezik politik dhe një rrezik për zbatimin e masave”, nënvizoi agjencia duke shtuar se do t’a zhvillojë analizën e saj lidhur me këtë çështje në ditët e ardhshme.

Zona euro vendosi javën e kaluar akordimin e një plani të ri shpëtimi që arrinte vlerën e 237 miliardë eurove për Greqinë me shpresën që ta shmangte daljen e saj nga bashkimi monetar, por pa larguar të gjitha shqetësimet për të ardhmen e vendit.