Romë, 31 dhjetor - Në një konferencë shtypi të organizuar në fund të vitit, kryeministri italian Mario Monti ka bërë të ditur se Qeveria italiane po përgatit një paketë masash për nxitjen e zhvillimit ekonomik vitin e ardhshëm.

Monti u tha gazetarëve se paketa e reformave do të përqendrohet në forcimin e konkurrencës dhe liberalizimin e tregut të punës në Itali.

Ai tha se masat janë pjesë e fazës së dytë të planit të qeverisë së tij për ta nxjerrë vendin nga recesioni. Qeveria e Montit e ka kaluar raundin e parë të masave shtrënguese.

Megjithatë, Monti paralajmëroi se Italia ka akoma nevojë për një “përgjigje të bashkuar” nga Bashkimi Evropian për të zgjidhur krizën e borxheve.

Ai tha: “Problemet që kemi sot, janë kryesisht probleme të një natyre evropiane dhe për këtë arsye duhet gjetur një zgjidhje e përbashkët, një zgjidhje që të jetë e njësuar dhe e fortë.”

Monti shtoi se, pavarësisht dy ankandeve të suksesshme të bonove të thesarit të kohëve të fundit në Itali, ai nuk mendon se turbullirat financiare për vendin e tij kanë përfunduar.

 Monti pritet t’u paraqesë masa të reja nxitjeje homologëve të tij të Bashkimit Evropian, kur ata të takohen në fillim të janarit të vitit të ardhshëm.