Prishtinë, 6 qershor - Shumica e ministrave dhe deputetëve të Kuvendit janë kujdesur që gratë e tyre t’i “rehatojnë” në kompani publike, apo në institucione të ndryshme shtetërore.

Ministri i Punëve të Brendshme, Bajram Rexhepi, vite më parë e ka punësuar gruan në Postë Telekomin e Kosovës, para se kjo e fundit të privatizohej, ku merr një pagë vjetore prej 7000 euro.

Edhe më shumë se bashkëshortja e Rexhepit, paguhet gruaja e ministrit të Bujqësisë, Blerand Stavileci, e cila ka rreth 12 mijë euro të hyra vjetore nga operatori i telefonisë mobile “Vala”.

Edhe bashkëpartiaku i Rexhepit dhe Stavilecit, deputeti Bekim Haxhiu i njohur me nofkën “Kamishi” e ka “rehatuar” gruan në PTK, ku merr pagë vjetore prej rreth 12 mijë euro.

Ndërsa bashkëshortja e zëvendësministrit të Administratës Publike, Hajredin Hyseni, është e punësuar në Aeroportin Ndërkombëtar të Prishtinës, ku paguhet 900 euro në muaj.

Edhe shefi i shefave të PDK-së, ashtu siç u bë i njohur në aferën e përgjimeve telefonike “Pronto”, Adem Grabovci, është kujdesur që bashkëshorten ta punësojë në kompaninë publike “Ibër Lepenc”, ku merr pagë vjetore prej 7960 euro, ndërsa djali i tij, Guxim Grabovci, i cili pati sulmuar një pjesëtar të Policisë së Kosovës, punon në Qendrën e Automjeteve të Kosovës, ku paguhet 5400 euro në vit.

/Zëri/