Moskë, 28 maj - Nga rezultatet e dala nga hulumtimi i Romir në lidhje me pritshmëritë e rusëve për ekonominë, shihet që tek të intervistuarit ka një mosbesim të madh në ekonominë ruse dhe rolin e Qeverisë ruse në këtë drejtim.

Ky konkluzion del pasi që më pak se një e katërta e rusëve të intervistuar ishin deklaruan se besojnë se situata ekonomike në Rusi do të përmirësohet në një të ardhme të afërt.

Sipas rezultateve të sondazhit, 22% e rusëve janë optimistë për situatën ekonomike në Rusi, pra presin përmirësime.

Numri i atyre që nuk presin përmirësim dhe as përkeqësim të situatës në ekonominë ruse në të ardhmen e afërt ishte 43% . Rreth një e treta (34%) e të anketuarve presin që situata ekonomike në vend të përkeqësohet.

Në numrin kaq të madh të atyre që nuk besojnë në rritje ekonomike në Rusi kanë ndikuar shumë faktorë.

Ndër faktorët kryesorë janë rënia e vlerës së të ardhurave personale në nivelin më të ulët në dekadën e fundit, rritja e varfërisë ku rreth 18 milionë rusë jetojnë nen nivelin e varfërisë, inflacioni, rënia e fuqisë blerëse etj

Dihet se ekonomia ruse është e varur nga eksportet e naftës, gazit dhe lëndëve të para, pra nuk është ekonomi përpunuese që shet produkte finale.

Kjo ndikon që çdo rënie e çmimeve të naftës, gazit dhe lëndëve të para, të ketë ndikim direkt në buxhetin e shtetit dhe mirëqenien e banorëve.