Prishtinë, 18 qershor - Për hir të muajit të shenjtë të Ramazanit dhe festës së Fitës Bajramit, me iniciativë të Shoqatës Humanitare Bamirëse së Kosovës Nëna Terezë, dhe me mbështetjen e qendrës tregtare Viva Fresh Store në Kosovë, fillon aksioni “Blej dhe dhuro” i cili ka për qëllim mbledhjen e produkteve ushqimore dhe higjienike për familjet që jetojnë në kushte të rënda.

Qëllimi i këtij aktiviteti është që qytetari të jetë kontribues i drejtpërdrejtë tek familjet nevojtare të Kosovës, ku përderisa kryejnë blerjen e tyre në të gjitha pikat e Viva Fresh Store nëpër Kosovë, të ndajnë nga një artikull, ushqimor apo higjienik, për t’i lënë tek këndi i Bamirësisë së Shoqatës Nëna Terezë të vendosura në hapësirat e Viva Fresh Store.

Përfaqësuesit nga Shoqata Nëna Terezë,  dhe nga Viva Fresh Store kanë theksuar se aksioni “Blej dhe dhuro” do të organizohet edhe kësaj rradhe me shpresë se do të jetë i sukesshëm ashtu si edhe vitin e kaluar, organizuar gjatë muajit të Ramazanit.

Duke uruar fillimin e muajit të shenjtë të Ramazanit dhe agjërim sa më të lehtë të gjithë besimtarëve myslimanë dhe qytetarëve të Kosovës, ata bëjnë thirrje që së bashku të shtrijmë duart familjeve nevojtare, duke treguar zemërgjerësi e bujari. Shoqata Nëna Terezë kryen misionin e saj humanitar në Kosovë tashmë qe 25 vite, andaj duke bashkuar forcat me Viva Fresh Store dhe të gjithë qytetarët e Kosovës, do të mundësohet që përmes iniciativave të tilla humanitare, të ndihmohen ata që kanë nevojë për ndihmë.

Në muajin e shenjtë të Ramazanit theksohet solidariteti, mirësia, dhe humanizmi, andaj, aksioni “Blej dhe dhuro” ofron mundësinë që të përkushtohemi për të ndihmuar të gjitha familjet kosovare në nevojë.

Aktiviteti do të zgjasë deri në ditën e fundit të muajit të Ramazanit dhe gjatë festës së Fitër Bajramit, ku të gjitha artikujt e grumbulluar do të paketohen nga stafi dhe vullnetarët e Shoqatës Nëna Terezë, dhe nga Viva Fresh Store. Shpërndarja e pakove do të bëhet në vazhdimësi, me t’u mbushur stendat e vendosura në të gjitha pikat e Viva Fresh Store.