Athinë, 7 prill - Qeveria gjermane i detyrohet Greqisë 278.7 miliardë euro dëmshpërblim për Luftën e Dytë Botërore, u shpreh të hënën zëvendësministri grek i Financave Dimitris Mardas.

Duke folur në një komision të parlamentit grek të ngritur për të gjetur shkaqet e problemeve ekonomike të Greqisë, Mardas bëri të ditur se kjo shifër është përcaktuar pas rishikimit të arkivave.

Qeveria e re greke ka rinisur një fushatë për të kërkuar dëmshpërblime nga Gjermania për krimet naziste dhe një kredi të marrë me forcë bankës qendrore greke gjatë Luftës së Dytë Botërore.

Berlini i ka hedhur poshtë pretendimet e Athinës, duke thënë se Gjermania i ka paguar tashmë Greqisë rreth 60 milionë euro dëmshpërblime lufte në vitin 1960.