Prishtinë, 3 tetor - Ministri i Zhvillimit Ekonomik, Fadil Ismajli ka pritur në takim Pierre Wever, Shef i Misionit të Ambasadës së Luksemburgut në Kosovë, i shoqëruar nga drejtori i ri i  Agjencisë për Bashkëpunim dhe Zhvillim - LuxDev, Pascal Rossignol.

Lux Dev është agjenci e Qeverisë së Luksemburgut për Bashkëpunim dhe Zhvillim që në vendin tonë është marrë kryesisht me mbështetjen e projekteve në sektorin e ujit dhe zhvillimit lokal, të cilat janë iniciuar nga MZHE.

Ministri Ismajli me këtë rast ka njoftuar zyrtarët e Luksemburgut me projektet që janë realizuar në sektorin e ujërave, ku një rol të rëndësishëm ka pasur edhe mbështetja financiare nga Lux Dev, duke theksuar se ky sektor përbën një nga prioritet e Qeverisë së Kosovës.

Më tej kreu i MZHE-së ka vënë në dukje se projektet që janë bazë për zhvillim ekonomik dhe përmirësimin e jetës së qytetarëve kanë një trajtim të veçantë në politikat dhe orientimet e Qeverisë.

Ministri Ismajli përsëriti mirënjohjen për shtetin e Luksemburgut për mbështetjen e që i ka dhënë dhe vazhdon t’i japë Kosovën në fusha të ndryshme, përfshirë këtu edhe agjencinë qeveritare Lux Dev, por jo vetëm, në funksion të zhvillimit të vendit.

Nga ana e tyre, Pierre Wever dhe Pascal Rossignol ritheksuan vazhdimin e mbështetjes Luksemburgut për Kosovën, ndërsa nënvizuan bashkëpunimin e mirë me institucionet e Kosovës.