Prishtinë, 2 prill - Në komunën e Suharekës dyshohet se ka keqpërdorime të mjeteve financiare me shpenzime të shumta për mallra dhe shërbime. Këtu bëhet fjalë për shpenzime të shumta për telefoni mobile dhe për dreka e darka, shkruan sot gazeta “Bota sot” .

Për shpenzimet e telekomunikimit (mbushje telefoni-“Vala”) komuna ka shpenzua  29 mijë e 588 euro.

Ndërkaq për dreka darka ka shpenzuar rreth gjysmë milioni euro. Te mjetet e Komunës pasqyra e realizimit për vitin 2012, teprica e të hyrave kundruall të dalave të buxhetit të Republikës së Kosovës në shumë  123.001.67€ janë mjete që Komunës i kanë ngelur në suficitin buxhetor qeveritar e prej tyre mjete te humbura për investime kapitale  janë 120.530.63 dhe pjesa tjetër 2.471.04 janë mjete të humbura nga kategoritë e tjera ekonomike.

Luljeta Baraliu, anëtare e Asamblesë Komunale në Komunën e Suharekës nga LDK-ja, tha  për gazetën “Bota sot” se te pasqyra e shpenzimeve të drejtorive sipas kodeve ekonomike janar-dhjetor 2012, te kategoria mallra dhe shërbime -mjete buxhetore, shihet se te shpenzimet e telekomunikimit (mbushje telefoni-“Vala”) komuna ka shpenzuar  gjithsej  29.588 euro, te shpenzimet për karburante për vetura dhe për ngrohje gjithsej janë shpenzuar 315.310 euro.

Sipas saj, te pasqyra e shpenzimeve mjete buxhetore, te kategoria mallra dhe shërbime, programi buxhetor-Zyra e Kuvendit (Asamblesë), në emër të shpenzimeve të telekomunikimit (mbushje telefoni-vala) janë shpenzuar 2520 euro, nëse e llogarisim në formulë sipas pakos të ofruar nga kompania “IPKO”  6€ mbushje në muaj për 35 këshilltar komunal sa ka Komuna e Suharekës, i bie 6x35=210€ në muaj, ndërsa vjetorja 210x12=2520€, mbushje telefoni që është ekuivalente me shumën e barabartë të paraqitur si shpenzim.

Por sipas Baraliut asnjëri nga këshilltarët komunal përveç kryesuesit të asamblesë nuk ka marrë këto mbushje dhe se nuk dihet destinomi i tyre se për kënd janë shpenzuar.

 “Më këtë mund të them se mungon papërgjegjësia, llogaridhënia dhe menaxhimi I kontrollit të brendshëm financiar”, thotë Baraliu.

Sipas saj, te pasqyra e të hyrave vetjake dhe krahasimi I performancës sipas periudhave kontabël shihet se komuna të hyrat vetjake i ka realizuar në krahasim me planifikimin vjetor të buxhetit vetëm 69.52%, që do të thotë ky realizim është nën planin e të hyrave, por përmbushja dhe tejkalimi i planit të të hyrave vetjake të cilat janë realizuar jashtë planifikimit buxhetor është realizimi në emër të eksproprijimit (te hyrat nga shpronësimi i autostradës).

Po ashtu vlen te ceket se te pasqyra e te hyrave (jotatimore) që rrjedhin nga kategoritë e caktuara te lejet për legalizimin e objekteve kanë qenë të planifikuara 267.500 €, por realizimi është 0  si për vitin 2012, ashtu edhe për vitin 2011, që do të thotë se qeveria komunale ka dështuar tërësisht ne përmbushjen e planit nga kjo kategori e të hyrës. Baraliu thotë se kryesuesi i Asamblesë Vesel Maliqaj asnjë herë nuk ka dhënë llogari për shpenzimet me telefoni.

Ndërkaq Vesel Maliqaj, kryesues i Asamblesë Komunale në Suharekë, thotë se nuk është e vërtet se ka keqpërdorur kartelat telefonike dhe mjetet për telefoa.

“Unë e them me plot përgjegjësi se asnjëherë nuk e kam keqpërdorur pozitën time zyrtare dhe se nuk është e vërtet se kam shpërndarë kartela telefonike për familjarët e mi për t’u ndaluar ato asambleistëve”, thotë Maliqaj për gazetën “Bota sot”.

Ai njëherësh thotë se të drejtën për shfrytëzimin e karteleve telefonik e gëzon me ligj personalisht, kurse asambleistët nuk kanë të drejtë fare që të marrin kartela telefonike (rimbursim) nga Komuna, shkruan sot gazeta “Bota sot”
.