Prishtinë, 9 korrik - Zëvendësministri i Zhvillimit Ekonomik, Gani Koci me bashkëpunëtorë ka pritur sot një delegacion të Institutit Gjeologjik të Kroacisë, që kryesohej nga drejtori i tij, Dr. Josip Halamic me ç’rast është diskutuar për bashkëpunimin bilateral në fushën e gjeologjisë.

Qëllimi i takimit ishte inicimi i marrëveshjes së bashkëpunimit në bazë të partneritetit në mes të Agjencisë Gjeologjike (AGJK) të Kosovës dhe Institutit Gjeologjik të Kroacisë (IGJK).

Gjatë takimit, Zv.ministri Koci i informoi zyrtarët e IGJK-së me punën e MZHE-së dhe AGJK-së, ndërsa shprehu gatishmërinë e thellimit të bashkëpunimit mes dy institucioneve përkatëse.

Nga ana e tij, drejtori i IGJK-së, Josip Halamic elaboroi punën që kryen Instituti Gjeologjik kroat dhe u dhuroi  zyrtarëve të MZHE-së,  Hartën Gjeologjike 1:300.000;  Sqaruesin e hartës; Librin e resurseve minerale; Librin e ujërave gjeotermale dhe  Atlasin e gjeokimisë.
 
Me këtë rast,. Halamiç propozoi që AGJK të konkurrojë për anëtarësim në Eurogeosurvey, ndërsa premtoi se Kroacia do të mbështes anëtarësimin e AGJK-së në këtë mekanizëm.

Ndryshe, në takim të pranishëm ishin edhe Këshilltari Shkencor i Institutit Gjeologjik Kroat, Damir Sllovenec, Udhëheqës i Departamentit të Gjeoinformacionit në kuadër të AGJK dhe Dukagjin Shala Udhëheqës i Divizionit të Gjeologjisë (DEM).