Prishtinë, 1 Dhjetor - Sipas Indeksit të Perceptimit të Korrupsionit të lansuar sot nga Transparency International (TI)  dhe TI-Kosova,  u konstatua se Korrupsioni vazhdon të njollos shumë shtete të botës,  përfshirë këtu edhe Kosovën.

Ky indeks tregon se disa qeveri edhe më tutje janë duke dështuar në mbrojtjen e  qytetarëve  nga dukuritë korruptive, pa marrë parasysh format e paraqitjes së saj, qoftë si keqpërdorim i resurseve publike, mitë-marrje apo vendimmarrje jotransparente.

Në këtë raport, TI paralajmëron se protestat e ndodhura përreth botës gjatë këtij viti, kanë qenë të nxitura nga niveli i korrupsionit dhe ekonomia jostabile, e që tregojnë qartë se qytetarët ndjejnë se liderët e tyre dhe institucionet publike nuk janë sa duhet transparente dhe  llogaridhënëse.

Në Indeksin e Perceptimit të Korrupsionit për vitin 2011, në nivel global, Kosova radhitet në vendin e 112,  që do  thotë se konsiderohet si një vend me nivel të lartë të korrupsionit , duke u vendosur kështu në një grup me shtetet si:  Algjeria, Egjipti, Moldavia, Senegali dhe Vietnami.

\"Mungesa e vullnetit politik dhe  neglizhenca e vazhdueshme e institucioneve tona   për ta luftuar këtë fenomen, ka bërë që Kosova të renditet si vendi me korruptuar edhe ne mesin e shteteve të rajonit, duke vështirësuar kështu mundësinë e krahasimit të saj  madje edhe me shtetet më të afërta ,” tha gjatë shpalosjes së këtij indeksi znj. Merita  Mustafa, Menaxhere e Programit Anti-korrupsion në KDI/TIK.

“Ky nivel i lartë i korrupsionit është duke e ngulfatur ekonomin e vendit, e më së shumti  është duke e ngarkuar qytetarin e Kosovës,  i cili, për shkak të korrupsionit detyrohet që të paguaj shuma shumëfish më të larta për produkte dhe shërbime të ndryshme,  ndërkohë që i njëjti fenomen  vazhdon të shpërblej një grup të caktuar të njerëzve nga sektori i biznesit dhe  zyrtarë të lartë publik.  Po ashtu, ky nivel i korrupsionit, është duke e rrezikuar edhe  aspiratën më të madhe të   vendit tonë, e që është  integrimi i saj në zonat  Euro-atlantike” tha më tej znj. Mustafa.

TIK i bënë thirrje Qeverisë, Parlamentit dhe të gjitha institucioneve tjera përgjegjëse, që ky “Indeks” dhe raportet tjera që flasin mbi nivelin e korrupsionit në Kosovë, të ndikojë në ndryshimin e qasjes së tyre ndaj këtyre fenomeneve, duke treguar përkushtimin maksimal dhe duke bërë veprime konkrete në luftë kundër korrupsionit si: fuqizimin dhe garantimin e plotë të pavarësisë së institucioneve që merren me luftën kundër- korrupsionit, ndërtimin dhe konsolidimin e mekanizmave që luftojnë këto dukuri,  plotësimin, ndryshimin dhe zbatimin e  legjislacionit kundër korrupsionit, si dhe ndërmarrjen e reformave të nevojshme të cilat kanë për qëllim reduktimin e veprave korruptive.

Indeksi Perceptimit të Korrupsionit 2011 vlerëson 183 shtete dhe territore, me nota nga 0(korrupsion i lartë) deri në 10 (shumë të pastra) dhe bazohet  në perceptimin e nivelit të korrupsionit në sektorin publik.

Ky indeks përdor të dhëna nga 17 sondazhe të ndryshme, bazuar në faktorë si:  zbatimi i ligjeve anti-korrupsion, qasja në dokumente zyrtare dhe konflikti interesit.

Dy të tretat (2/3) e shteteve të ranguara rezultojnë me notën më pak se 5.
Shtetet më të pastra që janë radhitur në këtë indeks janë: Zelanda e Re, e përcjellë nga Finlanda dhe Danimarka. Ndërsa, të fundit mbesin Somalia dhe Korea Veriore (të përfshira për herë të parë).