Prishtinë, 22 nëntor - Ministri i Financave Avdullah Hoti ka takuar sot përfaqësuesit e Komisionit Evropian, të kryesuar nga Hillen Francke, Koordinatore për programet ekonomike të Reformës dhe Zgjerim, DG NEAR në Komisionin Evropian,  me të cilët ka diskutuar për Programin për Reforma në Ekonomi (PRE).

Në këtë takim ministri Avdullah Hoti,  në cilësinë edhe të Koordinatorit Nacional për hartimin e dokumentit ‘Programi për Reforma në Ekonomi’ (PRE) si pjesë e dialogut për politika ekonomike ndërmjet BE-së dhe Republikës së Kosovës, bëri të ditur se “Në këtë proces, institucionet që ne përfaqësojmë kanë bërë një punë të madhe në forcimin dhe avancimin e këtij dialogu. Siç mund të jeni në dijeni, vlerësimet që kemi pranuar për dokumentin e parë të përpiluar (PRE 2015) kanë qenë mjaft pozitive, ndërkaq na gëzon edhe më shumë fakti se dorëzimi i dytë, ai i vitit të kaluar (PRE 2016) u vlerësua si përmirësim i dukshëm nga ai i pari”.

“Për mua këto vlerësime janë njohje e suksesit tonë të përbashkët, sidomos duke pasur parasysh se dorëzimi i këtij dokumenti na vë në nivel të barabartë me shtete që janë më të avancuara se ne në procesin e ‘European Semester’.\"

\"Është shumë e rëndësishme, besoj për të gjithë ne, që ky përmirësim në kualitet të dokumentit të vazhdojë edhe në dorëzimet e radhës. Prandaj, sot ju ftoj që në mënyrë të përbashkët, të hapim diskutimin mbi sfidat në vazhdim dhe ato të reja që na presin, të vlerësuara si të tilla përmes analizës diagnostikuese, e zhvilluar me ndihmën e ekspertëve të OECD”, shtoi Ministri Hoti.

Ai bëri të ditur se sfidat kanë të bëjnë me fushat si: Menaxhimi i Financave Publike, Energjia, transporti dhe tregu i telekomunikimit, zhvillimet sektoriale, mjedisi i biznesit dhe ulja e ekonomisë joformale, hulumtimi dhe inovacioni, tregtia e jashtme dhe përkrahja e investimeve, arsimi dhe aftësitë, punësimi dhe tregu i punës,  përfshirja sociale, ulja e varfërisë dhe mundësitë e barabarta.

Sipas ministrit Avdullah Hoti, “pjesa më e madhe e çështjeve nga fushat e sipër-përmendura janë ato të vitit të kaluar; meqë kemi të bëjmë me reforma strukturore është e kuptueshme se ato nuk mund të ndryshojnë dukshëm nga viti në vit. Megjithatë, kjo na tregon se duhet punuar më tepër në drejtim të tejkalimit të sfidave, e këtë mund ta arrijmë vetëm duke punuar së bashku”.

“PRE, si çdo shtet tjetër i Ballkanit Perëndimor, edhe Kosova e dorëzon në Komisionin Evropian në cilësinë e një shteti që fillon rrugëtimin brenda procesit të Stabilizim Asociimit si partner i barabartë. Në këtë kontekst, besoj se është në interesin e të gjithëve që të dorëzojmë një dokument sa më kualitativ në të cilin mund të mbështetemi për planet tona zhvillimore”, shtoi ministri Avdullah Hoti.

Ndërsa, Hillen Francke, Koordinatore për programet ekonomike për Reformë dhe Zgjerim, DG NEAR në Komisionin Evropian, theksoi se Komisioni Evropian dhe Organizata për Bashkëpunim Ekonomik dhe Zhvillim (OECD) do të ofrojnë përkrahjen e tyre gjatë  këtij procesi për të tejkaluar sfidat me të cilat përballet Kosova. Gjithashtu ne mund të themi se Kosova po bënë progres sa i përket  zhvillimit ekonomik të saj si dhe në fushën e raportimit dhe bashkëpunimit me BE-në.

Pas takimit me ministrin e Financave Avdullah Hoti, përfaqësuesit e Komisionit Evropian dhe të OECD-së vazhduan takimin e tyre me përfaqësuesit e institucioneve të Kosovës të cilat kanë të bëjnë me fushën e ekonomisë të udhëhequr nga Ministri i Financave Avdullah Hoti  dhe drejtori i Zyrës për Planifikim Strategjik pranë Zyrës së Kryeministrit Qemajl Marmullakaj.

Në këtë takim u diskutuan fushat prioritare, gjegjësisht masat e dala prej këtyre fushave veç e veç dhe përmirësimet që duhet bërë sipas komenteve të Komisionit Evropian.

Dokumenti i Programit për Reforma në Ekonomike i dorëzohet Komisionit Evropian në fund të janarit ku më pas jepen vlerësimet në lidhje me këtë dokument për secilin shtet të Ballkanit Perëndimor .