Konfiskimi i pasurisë së paligjshme, pa aktgjykim
Kjo mund të bëhet edhe pa aktgjykim dënues, nëse hyjnë në fuqi rekomandimet që janë dhënë përkitazi me Ligjin e ri antimafi.
Grupi Punues, që tashmë ka finalizuar një koncept dokument, ka propozuar që të mundësohet hetimi i pasurisë së politikanëve, të cilën e kanë krijuar nga 1 qershori i vitit 1999 shkruan sot Koha Ditore.
Përmes Ligjit antimafi synohet të rritet ndjeshëm shuma e konfiskimeve përfundimtare, ngase barra e të provuarit në masë të madhe do të kalojë në anën e të pandehurit duke lehtësuar kështu punën e organeve të ndjekjes.
Zyrtarë të prokurorisë dhe përfaqësues të shoqërisë civile kanë thënë se forma e vetme për të dekurajuar korrupsionin është përmes konfiskimit të pasurive të paligjshme.
Në konceptdokumentin që flet për pasurinë e fituar nё mёnyrë tё pajustifikueshme, një kopje të të cilit e ka siguruar gazeta, parashihen format e konfiskimit të saj.
/Koha Ditore/
