Mitrovicë, 3 tetor - “Konferenca Ndërkombëtare Multidiciplinare në Gjeoshkencë”, që organizohet nga Fakulteti i Gjeoshkencave në Universitetin e Mitrovicës “Isa Boletini” (UMIB), Komisioni i Pavarur për Miniera dhe Minerale, Ministria e Zhvillimit Ekonomik dhe Shërbimi Gjeologjik i Kosovës, është vendosur  edhe në listën e aktiviteteve në faqen zyrtare të Shërbimit Gjeologjik Evropian.

Si e tillë kjo Konferencë, e cila mbahet më 10 dhe 11 tetor në Universitetin e Mitrovicës “Isa Boletini”, është shndërruar në një  ngjarje shkencore  në gjithë Evropën.

Ndryshe, Konferenca ka zgjuar interesim tek shkencëtarët nga shumë vende të botës. Sipas organizatorëve deri me 20 korrik 2019, kur është mbyllur afati, për pjesëmarrje në konferencë janë regjistruar 86 pjesëmarrës.

U bë e ditur se janë dorëzuar gjithsej 55 abstrakte, prej të cilave janë pranuar 42 sosh.

Përveç studiuesve nga universitetet vendore, në konferencë do të marrin pjesë edhe studiues dhe shkencëtarë nga vende të ndryshme të botës, si nga Finlanda, Italia, Polonia, Turqia dhe Sllovenia.

Studiuesit që vijnë nga jashtë janë kryesisht profesorë në universitetet, me të cilat Fakulteti i Gjeoshkencave ka bashkëpunim.