Mitrovicë, 30 prill - Komuna e Mitrovicës, nënshkroi sot Marrëveshje Bashkëpunimi me OJQ-në “Community Building Mitrovica – CBM”, lidhur me “Projektin për mjedisin përkrahës afarist për bizneset e femrave në Mitrovicën e Veriut dhe Jugut”.

Kryetari i Komunës, Agim Bahtiri, uroj që projekti në fjalë të realizohet me sukses dhe të përfitojnë bizneset e grave në veçanti,  me çka do të përfitonte edhe zhvillimi ekonomik i vendit.

Drejtori për Bujqësi dhe Zhvillim Rural, Nasuf Aliu, tha se nga fillimi një nga synimet e kësaj drejtorie ka qenë identifikimi i partnerëve në Mitrovicë, që janë të specializuar në fusha të ndryshe, apo kanë një bagazh të punës së tyre dhe është konstatuar se një nga to është CBM.

“Kemi pa se kjo organizatë ka bërë një punë të mirë, ka një historik pozitiv dhe për këtë kemi pranuar të që bashkëpunimin tonë ta finalizojmë me nënshkrimin e kësaj marrëveshje, e cila është në përputhje me objektivat tona për themelimin e bizneseve të reja dhe zgjerimin e bizneseve ekzistuese”, tha Aliu.

Drejtoresha e CBM-së, Afërdita Sylaj, tha se përveç bashkëpunimit në implementim e projektit në fjalë, shpresojmë se bashkëpunimi ynë do të vazhdoj edhe më tutje në ato fusha ku mund të japim kontributin tonë.

“Ne shpresojmë se do të jemi pjesë e Konferencës së Investitorëve të cilën e organizon Komuna, ku do të mund t’i promovonim bizneset e grave, por edhe projektet tjera, e po ashtu edhe ne mendojmë të përfshijmë Komunën në çdo aktivitet tonin si organizatë”, theksoj Sylaj.

Projekti për të cilin sot u nënshkrua Marrëveshja e Bashkëpunimit, ka të bëjë me mbështetjen e grave në biznes, në të cilin do të përfshihen 100 gra, 30 nga të cilat do të përfitojnë grande, ndërkaq të tjerat do të jenë pjesë e trajnimeve dhe konsulencës për zhvillimin e bizneseve të tyre.