Prishtinë, 10 dhjetor -  Ministri i Financave Avdullah Hoti, ka pritur sot në takim ambasadorin kanadez  në Kroaci Daniel Maksymiuk  i  ngarkuar edhe për Kosovë,  ku kanë biseduar lidhur me thellimin e bashkëpunimit ekonomik dhe politik në mes të dy vendeve.

Me këtë rast Ministri Hoti e falënderoi Ambasadorin Maksymiuk për vizitën dhe për mbështetjen e përhershme që shteti Kanadez i ka  dhënë Kosovës, dhe e njoftoi atë për ndryshimin e politikave fiskale në favor të bizneseve.

Ministri Hoti gjithashtu shprehi gatishmërinë e tij për thellimin e  bashkëpunimit  ekonomik dhe institucional, me theks të veçantë në thithjen e investimeve të huaja.

Ndërsa, Ambasadori Maksymiuk falënderoi Ministrin Hoti për pritjen dhe shprehi gatishmërinë e tij dhe të shtetit kanadez për ta mbështetur Kosovën në aspektin ekonomik dhe politik edhe në të ardhmen, si dhe përkushtimin  për të rritur investimet e bizneseve kanadeze në Kosovë.