Pejë, 27 nëntor - “Unë konsumoj prodhime vendore, po ju”, ishte motoja e karnevalit të prodhimeve të Kosovës  të cilat janë prezantuar para konsumatorëve të Pejës, në kuadër të realizmit të “Javëve të Biznesit Kosovar 2013".

Agim Shahini, kryetar i Aleancës Kosovare të Bizneseve, tha se projekti tashmë tradicional ka për qëllim që qytetarët e Kosovës të konsumojnë prodhime vendore.

Gjatë  njëmbëdhjetë vjetëve kemi bërë të pamundurën që të ngritim vetëdijën e qytetarëve për konsumimin e prodhimeve vendore.

“Kjo është ndihmesa më e madhe që mund ti bëjë dikush prodhuesve vendës dhe krahas konsumimit të prodhimeve kosovare, rritet edhe zhvillimi ekonomik, mirëqenia qytetare dhe eksporti drejt vendeve tjera”, tha Agim Shahini.

Kryetari i Aleancës së Bizneseve Kosovare, kërkon nga institucionet lokale dhe ato qendrore që prodhuesit e Kosovës ti kenë prioritet dhe të bëjnë politika më të favorshme për zhvillimin e biznesit dhe rritjen ekonomike.

“Tashmë prodhimet kosovare janë të pranishme në shum ëvende të ndryshme dhe eksporti duhet të rritet edhe më shumë, sepse prodhimet e Kosovës janë të cilësisë së lartë dhe qytetarët duhet ti konsumojnë”, tha Shahini.

Sokol Ukaj, drejtor i Zhvillimit Ekonomik në Komunën e Pejës, tha se ky aktivtet tregon më së miri për mbështetjen e komunës ndaj biznesit dhe i cili ka për qëllim ngritjen e zhvillimit ekonomik jo vetëm të Komunës së Pejës, por të gjithë Kosovës. 

Ai tha se po mundohemi të bëjmë përmirësimin e mjedisit afaristë në Komunën e Pejës dhe krijimit të lehtësirave për biznesin.

“Si institucione komunale bashkarisht me bizneset kemi krijuar raporte të mira në mënyrë që ata të jenë më zhvilluar”, tha drejtori i Zhvillimit Ekonomik të Pejës.      

Hajriz Kokollari, pronar i fabrikës për prodhimin e pelenave nga Prizreni “Sllovenien partners”, tha se projekti “Javët e Biznesit Kosovar”, është një aktivitet shumë i rëndësishëm për promovimin dhe konsumimin e prodhimeve vendëse.

Pronari i Sllovenien partners, tregoi se prodhojnë lloje të ndryshme të pelenave që nga maji i vitit 2008 dhe tashmë pos një pjese të madhe të tregut të Kosovës eksportojnë edhe jashtë vendit dhe kërkesat po rriten.

“Në të ardhmen do të rrisim kapacitete edhe me prodhime të reja të pelenave për të rritur, pecetave për femra, faculeta të lagëta e prodhime tjera që janë të standardeve ndërkombëtare”, tha Kokollari.

Karnevali “Javët e Biznesit Kosovar 2013” me 29 nëntor vazhdon në Mitrovicë  dhe do të vazhdoj gjatë gjithë javëve nëpër tërë Kosovën dhe më gjerë deri më datën 26 dhjetor 2013.