Prishtinë, 8 tetor - Edhe sot ministri i Diasporës, Valon Murati, vizitoi tri kompani, investime këto mjaft të suksesshme nga diaspora.

Gjatë vizitës në kompanitë  ”KosovaTex”, fabrikë për prodhimin e pantallonave (Prishtinë), “MeCatyp-KS”, fabrika për prodhimin e pjesëve mekanike për fusha të ndryshme, “KEMA PACK”, fabrikë për prodhimin e paketave, të llojeve të ndryshme, dhe “Eurofol” (Ferizaj), fabrikë riciklimi, ministri u njoftua për procesin e punës, për numrin e punëtorëve, për mjetet me të cilat punohet.

Të gjitha këto kompani, me shumë sukses, prodhimet e tyre i plasojnë në tregun evropian.

Mirëpo, përveç sukseseve, pothuajse të gjithë drejtuesit e këtyre kompanive ballafaqohen edhe me pengesa e probleme të ndryshme  gjatë punës së tyre.

Ministri Murati, duke i njoftuar për krijimin e një grupi të punës për tërheqjen e investimeve nga diaspora, në kuadër të Këshillit Kombëtar për Zhvillim Ekonomik, tha se tash e tutje për të  gjitha shqetësimet e problemet, por edhe për propozime e ide  mund t’i drejtohen këtij grupi.

“Grupi i punës, përveç tërheqjes së investimeve nga diaspora, do të merret edhe me shqyrtimin dhe trajtimin e problemeve  në dikastere të caktuara. Nëpërmjet këtij mekanizmi të krijuar synojmë të jemi zëri juaj, të jemi afër jush”, tha ndër të tjera ministri Murati.

Qëllimi i këtyre vizitave ishte që këta investues nga diaspora ta ndiejnë mbështetjen institucionale, si dhe të njohja  për së afërmi me sukseset dhe proceset nëpër të cilat këto kompani kalojnë.