Tiranë, 30 shtator - Shqipëria para viteve \'90 ishte një njollë e bardhë në hartën e investuesve të mëdhenj ndërkombëtarë. Më pas, doli në sipërfaqe dhe u vendos në vëmendjen e investitorëve.

Megjithatë, duke bërë një kronologji të statistikave në vite, investimet e huaja kanë nisur të rriten dhe të shtohen veçanërisht pas vitit 2005, periudhë kjo kur u shënuan reforma të rëndësishme ekonomike dhe fiskale.

Sipas raportimit të Kombeve të Bashkuara për Tregtinë dhe Zhvillimin, për vitin 2011, në vitin 2006 investimet e huaja llogariteshin 325 milionë dollarë.

Kjo vlerë u rrit dhe kulmoi në vitin 2009, kur investimet e huaja llogariteshin 979 milionë dollarë dhe në vitin 2010, Shqipëria arriti të thithë plot 1097 milionë dollarë investime të huaja direkte.

Bazuar në raportin në fjalë, faktohet se investimet e huaja u rritën me më tepër se 300 për qind.

Në krizën më të keqe evropiane dhe një nga më të këqijat në botë, investimet e huaja direkte në vendin tonë, për periudhën 2006-2010, u rritën rreth 316 përqind.

Këto investime kanë qenë kryesisht të orientuara në sektorë si energjetika, minierat, telekomunikacioni, sektori financiar (bankat), sektori i sigurimeve, infrastruktura etj.

Raporti i Kombeve të Bashkuara e vendos Shqipërinë të dytën pas Serbisë në rajon, për vlerën e lartë të thithjes së investimeve të huaja në sektorë të ndryshëm.

Po ashtu, vendi ynë është renditur në raportin e UNCTAD si vendi i 18-të në botë përsa i përket indeksit të performancës së Investimeve të Huaja Direkte duke bërë një përmirësim të madh krahasuar me vendin e 78-të ku pozicionohej në vitin 2006.