Berlin, 30 shtator - Shkalla e ulët e inflacionit në Gjermani reflekton në rënien e madhe e të vazhdueshme të shpenzimeve për energjinë.

Shkalla e inflacionit vjetor në Gjermani ra në zero në shtator duke shtuar presionin mbi Bankën Qendrore Evropiane (ECB) për përshpejtimin e masave për parandalimin e rrezikut të deflacionit në Eurozonë.

”Çmimet e konsumit në ekonominë më të madhe të Evropës u rritën me 0,2 për qind në gusht”, njoftoi të martën zyra gjermane e statistikave, Destatis.

Pritshmëritë e analistëve ishin një rritje prej 0,1 për qind për shtatorin krahasuar me të njëjtën periudhë të vitit të kaluar.

Shkalla e ulët e inflacionit reflekton në rënien e madhe e të vazhdueshme të shpenzimeve për energjinë.

Banka Qendrore Evropiane është përpjekur që t’i drejtojë çmimet e konsumit në synimin vjetor të inflacionit nën dy për qind, duke shpenzuar 60 miliardë euro (67,4 miliardë dollar) në muaj për blerjen e bondeve të sektorëve shtetërore dhe privatë në 19 vendet anëtare të zonës euro.

Gjithsesi, përpjekjet e ECB-së janë ndeshur me rënien e ndjeshme të çmimeve të naftës.

Destatis tha se çmimi i energjisë në Gjermani ra me 9,3 për qind në shtator, pas rënies prej 7,6 për qind të regjistruar në gusht.

Të dhënat treguan se komponentët e tjerë të inflacionit gjerman përfshirë qiratë, ushqimet dhe shërbimet u rritën në shtator.