Prishtinë, 3 maj - Në një ceremoni të organizuar nga Inspektorati Policor i Kosovës (IPK) sot u bë inaugurimi i objektit të renovuar të IPK-së.

Projekti i renovimit të objektit ka filluar vitin e kaluar për tu finalizuar këtë vit dhe ofron kushte më të mira për punë me një hapësirë prej rreth 2700 metra katrorë.

Përmirësimi i kushteve të punës për zyrtarët e IPK-së është një prej faktorëve që do të ndikojë pozitivisht në përmbushjen e objektivave ligjore të parapara me planin zhvillimor dhe strategjik të Inspektoratit Policor të Kosovës.

Ministri i MPB-së, z. Bajram Rexhepi duke i uruar pjesëtarët e IPK-së dhe qytetarët për objektin e ri të IPK-së theksoi se tani presin rezultate edhe më të mira nga Inspektorati Policor i Kosovës drejt përmbushjes së objektivave ligjore të tyre.

Duke folur rreth këtij projekti kapital, Kryeshefi Ekzekutiv i IPK-së, z. Fitim Shishani, theksoi se ky hap shënon edhe përmbushjen e një prej objektivave strategjike të Inspektoratit Policor të Kosovës:

“Në fillim të kësaj jave ne prezantuam para qytetarëve të arriturat dhe sfidat e IPK-së në përmbledhjen e raportit vjetor, inaugurimi i objektit sot sigurisht e përforcon besimin tek qytetarët se Inspektorati do të punojë vazhdimisht për mbrojtjen e të drejtave të tyre të parapara me Kushtetutën e vendit.\"

\"Tani me kushte të reja të punës, ne do të vazhdojmë të jemi një lider i njohur shtetëror në zbatimin e mandateve ligjore, për t’i ofruar ndihmë policisë sonë, me qëllim të parandalimit të keq-menaxhimit, korrupsionit dhe aktiviteteve të tjera kriminale në çdo sektor të policisë” – theksoi z. Shishani

Objekti i ri i renovuar është në përputhje me të gjitha standardet evropiane, me një hapësirë prej 2.700 metrave katrorë,  82 zyrave, sallave dhe hapësirave të tjera për punë.

Ky objekt ndodhet në afërsi të shkollës fillore përgjatë rrugës kryesore të Hajvalisë,  rrugës magjistrale Prishtinë Gjilan, kthesa te tabela për në hyrjen e fshatit Hajvali.