Prishtinë, 15 mars - Ministri i Financave, Avdullah Hoti ka njoftuar opinionin në lidhje me raportin  vjetor për 2014 nga Organi Shqyrtues i Prokurimit (OSHP) lidhur me aktivitetet e prokurimit për vitin 2014.

Në cilësinë e Ministrit të Financave, si përgjegjës për paranë publike ai ka vlerëuar se gjendja është brengosëse për mënyrën se si po shfrytëzohet paraja publike.

Shumë organizata buxhetore, në 537 raste të raportuara, nuk kanë respektuar ligjin e prokurimit publik, ka pasur parregullsi në vlerësimin e ofertave, në marrjen e vendimeve të gabuara për fituesit, në trajtim jo të barabartë në ofertuesve, në dosjet e tenderit, specifikimet teknike, kritere për dhënie të kontratës dhe shkelje të tjera.

Prej këtyre 537 ankesave, për shkak të shkeljeve të ligjit të prokurimit, në 162 raste janë detyruar organizatat buxhetore të bëjnë rivlerësim të ofertave, ndërkaq në 104 raste janë detyruar të ri-tenderojnë projektin. Vlera e mjeteve financiare të involvuara në këto tenderime nuk është bërë e ditur në raport.

Numri i ankesave të pranuara në OSHP është dyfishuar nga viti 2008 e këndej, ndërkaq krahasuar me vitin 2013, numri i ankesave është rritur me 14.5%.

Ministri Hoti ka vlerësuar se kjo gjendje shtron nevojën për intervenim urgjent në dy drejtime, në drejtim të ndryshimit të ligjit të prokurimit publik dhe në ngritjen e kapaciteteve dhe etikës profesionale të zyrtarëve të prokurimit në të gjitha organizatat buxhetore.

\"Unë jam i vendosur që të sigurojë se paraja publike po përdoret sipas ligjit dhe në interesin më të mirë të qytetarëve. Ashtu siç kam deklaruar me rastin e marrjes së detyrës, do të jem plotësisht transparent për shpenzimin e secilit cent të parasë publike dhe do të kërkoj llogari nga cilido zyrtar publik\", ka thënë Hoti.

Ai ka bërë të ditur se në javët në vijim do të dërgojn ligjin e prokurimit publik në Qeveri dhe pastaj në Parlament.

Ligji sipas tij do të përcaktojë rregullat e reja të prokurimit publik dhe do të forcojë llogaridhënien dhe transparencën.

\"Njëkohësisht, po punojmë në përgatitjen e platformës elektronike për të filluar zbatimin e prokurimit elektronik në të gjitha organizatat buxhetore. Kjo do të rrisë në maksimum transparencën gjatë procesit të tenderimeve dhe do të shkëpusë kontaktet e zyrtarëve të prokurimit me ofertuesit.\"

\"Po ashtu, me këtë sistem elektronik, çdo veprim i zyrtarëve të prokurimit do të jetë i gjurmueshëm në sistem duke rritur kështu përgjegjësinë dhe adresuar atë tek personi adekuat\", ka theksuar në fund ministri Hoti.